«خلق‌ارا آفتلر خوفینی کمه‌یتیریش کونی» مناسبتی بیلن طالبلر طبيعي آفتلر و اقلیم اۉزگریشلری عاقبتیده یوزه‌گه کېله‌دیگن ضررلرنی کمه‌یتیریش اوچون خلق‌ارا تخنیکي و مالیوي یاردمدن عدالتلی فایده‌لنیش امکانینی سۉره‌دی.
طالبلر باش وزیری نینگ اقتصادي مسأله‌لر بۉییچه اۉرین‌باسری عبدالغنی برادر بوگون (سه‌شنبه، ۲۱-میزان) کابلدهگی تدبیرده سۉزله‌گن نطقیده بونده‌ی یاردمدن فایده‌لنیش افغانستان‌نینگ حقوقی اېکنینی ایتدی.
او خلق‌ارا همجعیت و خلق‌ارا تشکیلاتلردن اقلیم اۉزگریشیگه قرشی کوره‌شنی «سیاسي ملاحظه‌لر» بیلن باغله‌مسلیکنی سۉره‌دی.
طالبلر باش وزیری‌نینگ اقتصادي مسأله‌لر بۉییچه اۉرین‌باسری افغانستان ایسّیقخانه گازلرینی چیقریش و گلوبل اقلیم نینگ بوزیلیشیگه هېچ قنده‌ی حصه قۉشمه‌گنینی، بیراق دنیا مملکتلری، خصوصاً، ییریک صناعت و ایشلب چیقرووچی دولتلر تامانیدن چیقریله‌یاتگن ایسّیقخانه گازلری عاقبتیدن منتظم ضرر کۉره‌یاتگنینی ایتدی.
او شونده‌ی دېدی: «معمانی یره‌تیشده هېچ قنده‌ی حصه‌میز بۉلمه‌گن حالده، اونینگ آغیر و مرکّب عاقبتلریگه چیده‌شیمیز همده باشقه‌لر سبب بۉلگن ویرانکار ضرر نینگ نرخینی تۉله‌شیمیز گلوبل اقلیم عدالتی تمایللریگه مطلقا ماس کېلمه‌یدی.»
عبدالغنی برادر خلق‌ارا همجعیت زمانه‌وي واسطه‌لر، طبيعي آفتلر یوز بېریشیدن آلدینگی آگاهلنتیریش تیزیملری، ایلغار قوتقروو اسکونه‌لری بیلن تأمینلش و تخنیکي صلاحیتنی مستحکملش باره‌سیده افغانستانگه همکارلیک قیلیشگه چقیردی.
افغانستان اقلیم اۉزگریشیدن اېنگ کۉپ ضرر کۉرگن دنیاده‌گی اۉنته دولت قطاریگه کیره‌‌دی مملکت سۉنگگی بېش ییل دوامیده کېتمه-کېت کوچلی قورغاقچیلیککه دوچ کېلگن. شونینگدېک، اقلیم اۉزگریشی عاقبتیده کوچلی یاغینگرچیلیک و ویرانکار تاشقینلر هم کوزه‌تیلگن.
