هلمندده‌گی منبعلرنینگ ایتیشیچه، آلتی آی اوّل طالبلر تامانیدن حبسگه آلینگن سابق حربي خدمتچی‌نینگ جسدی عایله‌سیگه تاپشیریلگن.
بیر منبع نینگ ایتیشیچه، هلمندده‌گی محلي پولیس قوماندانلریدن بیری بۉلگن الله‌داد بادی‌زی آلتی آی اوّل طالبلر استخباراتی تامانیدن لشکرگاه شهری‌نینگ بیرینچی خوفسیزلیک حدودیده حبسگه آلینگن. اۉشه پیتده طالبلر استخباراتی بو سابق حربي خدمتچی‌نینگ حبسگه آلینگنینی رد اېتگن اېدی.
اوچ آی اوّل بیر منبع «اطلاعات‌روز» گزېته‌سیگه بېرگن صحبتیده الله‌داد بادی‌زی طالبلر قماقخانه‌سیده قتّيق قییناقلرگه دچار قیلینه‌یاتگنینی ایتگن اېدی.
بیراق حاضرچه بو سابق حربي خدمتچی.نینگ قنده‌ی شرایطده وفات اېتگنی نامعلوم.
منبعگه کۉره، اونینگ جسدی کېچه طالبلرنینگ امنیه قوماندانلیگی تامانیدن عایله اعضالریگه تاپشیریلگن.
منبع‌نینگ قۉشیمچه قیلیشیچه، بادی‌زی سابق حربي خدمتچی نینگ دفن مراسمی دوشنبه کونی مرجه تومنیده اۉتکزیلگن.
سۉنگگی بېش ییل دوامیده طالبلرنینگ عمومي عفو اعلان قیلگنیگه قره‌مه‌ی، سابق حربي خدمتچیلر نینگ اۉلدیریلیشی دوام اېتماقده. اَیریم حاللرده الله‌داد کبی سابق حربي خدمتچیلر طالبان تامانیدن حبسگه آلینیب، کېینچه‌لیک جسدلری عایله‌لریگه تاپشیریلگن.
باشقه حالتلرده اېسه سابق حربي خدمتچیلر نامعلوم شخصلر تامانیدن سِرلی طرزده اۉلدیریلگن. شونگه قره‌مه‌ی، طالبان اۉز رهبری‌نینگ عفو حقیده‌گی فرمانیگه عمل قیله‌یاتگنینی دعوا قیلماقده.
