طالبلرنینگ تشقی ایشلر وزیری امیرخان متقی قطرنینگ کابلدهگی اېلچیسی مردف القاشوطی بیلن اوچره‌شیب، مذاکره اۉتکزدی.
طالبلر تشقی ایشلر وزیرلیگی بوگون (سه‌شنبه، ۲۱مېزان) نشر قیلگن بیاناتیده ایتیلیشیچه، اوچره‌شووده «افغانستان و قطر اۉرته‌سیده‌گی ایکّی تامانله‌مه مناسبتلر، خصوصاً، طالبلرنینگ خلق‌ارا همجعیت بیلن علاقه‌لرینی مستحکملش باره‌سیده قطر تامانیدن عملگه آشیریله‌یاتگن سعی-حرکتلر و یره‌تیله‌یاتگن امکانیتلر یوزه‌سیدن کېنگ قمراولی محاکمه‌لر اۉتکزیلگن».
وزیرلیک‌نینگ قۉشیمچه قیلیشیچه، متقی طالبلرنینگ خلق‌ارا همجعیت بیلن علاقه‌لری کېنگه‌ییب باره‌یاتگنینی تأکیدلب، بو باره‌ده‌گی سعی-حرکتلری اوچون قطرگه منّتدارلیک بیلدیرگن.
طالبلر تشقی ایشلر وزیرلیگی نینگ معلوم قیلیشیچه، قطر اېلچیسی بو باره‌ده‌گی یوتوقلرنی امیدبخش دېب بهاله‌گن و مملکتی‌نینگ سعی-حرکتلری دوام اېتتیریلیشیگه ایشانتیرگن.
سۉنگگی بېش ییلدن آرتیق وقت دوامیده طالبلر و قطر اۉرته‌سیده کېنگ کۉلملی سیاسي همکارلیک موجود. قطر، اساسن، تورلی مسأله‌لر، جمله‌دن، مهاجرلرنی دېپورت قیلیش و گروگه آلینگن شخصلرنی آزاد اېتیش بۉییچه طالبان و غرب دولتلری اۉرته‌سیده‌گی مذاکره‌لرگه واسطه‌چیلیک قیلیب کېلگن.
