قیرغیزستان حکومتی اروپا نینگ افغانستان و افریقا دولتلریدن چیقریب یوباریلگن مهاجرلرنی قبول قیلیش حقیده‌گی تکلیفینی رد اېتدی.
«قیرغیزستان۲۴» ترماغی خبریگه کۉره، قیرغیزستان تشقی ایشلر وزیری جین‌بک کولوبایف تیناوون (سه‌شنبه، ۲۱-میزه‌ن) اروپا نینگ اوشبو تکلیفی رد اېتیلگنینی معلوم قیلگن.
جین‌بک کولوبایف‌نینگ ایتیشیچه، اروپا قیرغیزستانگه افغانستان و افریقا دولتلریدن کېلگن مهاجرلرنی قبول قیلیشنی تکلیف قیلگن. بونینگ عوضیگه اروپا دولتلری قیرغیزستان فقرالریگه ایشلش امکانیتینی بېریشنی تکلیف قیلگن.
کولوبایف قیرغیزستان پارلمانی نینگ خلق‌ارا ایشلر، مدافعه، خوفسیزلیک و مهاجرلر کمیته‌سی اعضالری بیلن اوچره‌شووده اروپا نینگ بو تکلیفینی «قطعیاً» رد اېتیشینی و اونگه قرشی اېکنینی بیلدیرگن.
قیرغیزستان قانونچیلری تشقی ایشلر وزیریدن فقرالرنی رسمي ایشگه جایلشتیریش مقصدیده خارجگه یوباریش میکانیزملری بۉییچه قنده‌ی ینگی رېجه‌لر بارلیگینی سۉره‌گن.
او شونده‌ی دېگن: «قیرغیزستان اروپا دولتلری تامانیدن تکلیف اېتیلگن شرطلر اساسیده مقصدلی مذاکره‌لر آلیب باریشنی رېجه‌لشتیرمه‌یپتی».
اونینگ قۉشیمچه قیلگن: «اگر امکانیت بۉلسه، فقرالریمیز باریب ایشله‌سین. اما بیز بو شرطلر بۉییچه فعال مذاکره آلیب بارمه‌یمیز».
قیرغیزستان تشقی ایشلر وزیری قَیسی اروپا دولتلری و قنده‌ی شرطلر اساسیده مهاجرلرنی قبول قیلیش تکلیفینی بیلدیرگنینی انیقلشتیرمه‌گن.
اوّلراق آلمان و اتریش حکومتلری اۉزبېکستان بیلن هم شونگه اۉخشش مذاکره‌لر آلیب بارگن اېدی.
اوشبو ایکّی اروپا دولتی و اۉزبېکستان اۉرته‌سیده اېریشیلگن کېلیشووگه کۉره، تاشکېنت اقتصادي کمک، جمله‌دن، آلمان و اتریشلیک اینوستارلرنی جلب قیلیش عوضیگه افغانستانلیک مهاجرلرنی جایلشتیریش اوچون کمپ تشکیل قیله‌دی.
آلمان و اتریش جنایت صادر اېتگنی یاکه باش‌پناه سۉراولری رد اېتیلگنی سببلی اوشبو مملکتلرده قالیش حقوقیدن محروم بۉلگن افغانستانلیک مهاجرلرنی اوّل اۉزبېکستانگه چیقریب یوباره‌دی. شوندن سۉنگ تاشکېنت اولرنی کابلگه آلیب باریب، طالبانگه تاپشیره‌دی.
