اسلام همکارلیک تشکیلاتی عراق پایتختی بغداد شهریده بۉلیب اۉته‌دیگن تشکیلات تشقی ایشلر وزیرلری کېنگشی نینگ ۵۲-ییغیلیشیده افغانستانده‌گی بحران محاکمه قیلینه‌دیگن اساسي مسأله‌لردن بیری بۉلیشینی معلوم قیلدی.
اوشبو ییغیلیش کېله‌سی هفته، ۱۷ و ۱۸-اکتوبر کونلری اۉتکزیله‌دی.
اسلام همکارلیک تشکیلاتی بوگون، چهارشنبه کونی (۲۲میزان) ایکس ترماغیده یازیشیچه، «یمن وضعیتی، سودان و افغانستانده‌گی بخرانلر، اسرایل نینگ سوريه‌گه قرشی تجاوزی، شونینگدېک، مسلمان آزچیلیکلر و جماعه‌لری نینگ احوالی کبی مهم منطقوي مسأله‌لر تشکیلات تشقی ایشلر وزیرلری ییغیلیشی‌نینگ کون ترتیبیدن ا‌ۉرین آلگن».
شونینگدېک، ییغیلیشده ۲۰۲۵- ییلگی اسلام‌حراسی گزارشی هم کۉریب چیقیله‌دی.
سۉنگگی کونلرده اسلام همکارلیک تشکیلاتی‌نینگ بیر هیئتسی کابلگه تشریف بویوردی. هیئت طالبلر رسميلری بیلن اوچره‌شیشدن تشقری، بیرلشگن ملتلر تشکیلاتی‌نینگ و اروپا اتفاقی وکیللری بیلن هم مذاکره‌لر اۉتکزدی.
اسلام همکارلیک تشکیلاتی بیاناتیده ایتیلیشیچه، تشکیلات باش کاتبی نینگ افغانستان بۉییچه مخصوص وکیلی طارق علی بخیت افغانستانده‌گی بیرلشگن ملتلر تشکیلاتی‌نینگ یاردم اداره‌سی (یوناما) سیاسي مسأله‌لر بۉلیمی باشلیغی سکاتت اسمیت همده یونیسف وکیلی تاج‌الدین اۉیواله بیلن افغانستانده‌گی گومانیتار وضعیت و خلق‌ارا همجعیت نینگ مملکتده‌گی دوام اېته‌یاتگن سعی-حرکتلری حقیده فکر المشگن.
شونینگدېک، تامانلر افغانستان احتیاجلرینی قاندیریش اوچون خلق‌ارا همکارلر اۉرته‌سیده‌گی ملاقات و موافقلشتیریشنی دوام اېتتیریش مهم‌لیگینی تأکیدله‌گن.
اسلام همکارلیک تشکیلاتی وکیلی اروپا اتفاقی وکیللری بیلن اوچره‌شووده هم انسان پرورلیک احتیاجلرنی قاندیریش همده ساغلیقنی سه‌قلش، تعلیم و کۉکنار یېتیشتیریشگه مقابل تیریکچیلیک منبعلرینی یره‌تیش کبی مهم ساحه‌لرده همکارلیک امکانیتلرینی کۉریب چیقیش مسأله‌لرینی محاکمه قیلگن.
