انسان حقوقلرینی کوزه‌تیش تشکیلاتی فرانسه حکومتیدن افغانستانلیک مهاجرلرنی طالبلر نظارتی آستیده‌گی افغانستانگه دېپورت قیلیش بۉییچه هر قنده‌ی رېجه‌نی توخته‌تیشنی سۉردی.
انسان حقوقلرینی کوزه‌تیش تشکیلاتی‌نینگ افغانستان بۉییچه تدقیقاتچیسی فرشته عباسی نینگ ایتیشیچه، افغانستانلیک مهاجرلر نینگ فرانسه‌دن دېپورت قیلینیشی اولرنی تعقیب، قییناقلر و انسان حقوقلری نینگ باشقه جدّي بوزیلیشلریگه دچار قیلیشی ممکن. بو اېسه فرانسه نینگ انسان حقوقلری ساحه‌سیده‌گی خلق‌ارا مجبوريتلریگه ضد.
فرانسه حکومتی یقینده ناقانوني مهاجرلرنی افغانستانگه دېپورت قیلیشنی آسانلشتیریش مقصدیده طالبان بیلن «تخنیکي ملاقات» باشله‌گنینی تصدیقله‌دی.
فرانسه تشقی ایشلر وزیرلیگی اوشبو ملاقاتلردن مقصد «فرانسه توپراغیده ناقانوني روشده بۉلیب تورگن و ملي خوفسیزلیککه تهدید ساله‌یاتگن افغانستانلیکلرنی دېپورت قیلیشنی آسانلشتیریش» اېکنینی بیلدیرگن.
انسان حقوقلری کوزه‌تیش تشکیلاتی‌نینگ افغانستان بۉییچه تدقیقاتچیسی اوشبو «تخنیکي ملاقات»نی فرانسه نینگ افغانستانلیک مهاجرلرگه نسبتاً سیاستیده‌گی «خوفلی اۉزگریش» دېب بهاله‌گن.
اونینگ قۉشیمچه قیلیشیچه، فرانسه رسميلری بو ملاقاتلر چېکلنگن دایره‌ده آلیب باریله‌یاتگنینی اَیتماقده، بیراق حاضرگچه علیحده خوف آستیده‌گی شخصلر، جمله‌دن عیاللر، ضرر و تعقیبلردن حمایه قیلینیشیگه هېچ قنده‌ی کفالت بېریلمه‌گن.
عباسی‌نینگ ایتیشیچه: «فرانسه‌نینگ مهاجرلرنی قَیتریش جریانیده طالبلر بیلن همکارلیک قیلیشی، انسان حقوقلری‌نینگ قۉپال بوزیلیشی و خلقنی تیزیملی روشده باستیریش اوچون اوشبو گروه‌نینگ جوابگرلیگینی تۉلیق انگله‌گن حالده، او بیلن همکارلیک قیلیشنی انگله‌ته‌دی.»
او طالبلر انسان حقوقلرینی کېنگ مقیاسده بوزیشده دوام اېته‌یاتگن بیر پیتده هېچ بیر دولت باش‌پناه ایزلاوچیلرنی افغانستانگه مجبورن قَیترمسلیگی کېره‌کلیگینی تأکیدله‌گن.
انسان حقوقلری کوزه‌تیش تشکیلاتی‌نینگ افغانستان بۉییچه تدقیقاتچیسی شونده‌ی دېگن: «فرانسه افغانستانلیکلرنی افغانستانگه دېپورت قیلیش بۉییچه هر قنده‌ی رېجه‌نی توخته‌تیشی کېره‌ک. شونینگدېک، مهاجرلرنی نظارت قیلیش ساحه‌سیده‌گی هر قنده‌ی همکارلیک آدملرنی حقیقي تعقیب خوفی یاکه بوندن-ده آغیرراق عاقبتلرگه دوچ کېله‌دیگن مملکتگه قَیتریش واسطه‌سیگه ایلنمسلیگی کېره‌ک.»
طالبلر و فرانسه اۉرته‌سیده‌گی ملاقات طالبلر هیئتسی بروکسل‌گه سفر قیلیب، اروپا کمیسیونی اعضا دولتلری بیلن مهاجرلرنی دېپورت قیلیش مسأله‌سیده مذاکره‌لر آلیب بارگنیدن کېین باشلنگن.
اروپا نینگ باشقه بیر قطار دولتلری، جمله‌دن آلمان هم افغانستانلیک مهاجرلرنی دېپورت قیلیش مسأله‌سیده طالبلر بیلن مذاکره‌لر آلیب بارگن. آلمان طالبان بیلن اېریشیلگن کېلیشوودن سۉنگ سۉنگگی بیر ییل ایچیده ۲۶۳ کیشی مهاجرنی افغانستانگه دېپورت قیلگن.
اروپا دولتلری‌نینگ طالب بیلن مهاجرلرنی دېپورت قیلیش بۉییچه ملاقاتلری اوشبو گروه افغانستان اوستیدن قَیته نظارت اۉرنتگنیدن بېری انسان حقوقلرینی، جمله‌دن عیاللر و قیزلر، شونینگدېک اېتنیک، دیني و گېندېر آزچیلیکلر حقوقلرینی کېنگ مقیاسده بوزیشده عیبلنه‌یاتگن بیر پیتده عملگه آشیریلماقده.
شونینگدېک، طالبلر تامانیدن افغانستانگه قَیتریلگن مهاجرلرنینگ حبسگه آلینیشی و قییناققه سالینگنی حقیده کۉپلب حساباتلر اعلان قیلینگن.
ه
