طالبلرنینگ تشقی ایشلر وزیری امیرخان متقی هندستان‌نینگ کابلدهگی اېلچیخانه‌سی مؤقت ایشلر وکیلی یتین پتیل بیلن اوچره‌شدی.
طالبلر تشقی ایشلر وزیرلیگی بوگون، پنج‌شنبه کونی (۲۳-میزان) ترقه‌تگن بیاناتیده ایتیلیشیچه، متقی و پتیل ایکّی تامانله‌مه همکارلیک مسأله‌لری یوزه‌سیدن مذاکره اۉتکزگن.
بیاناتگه کۉره، متقی طالبلر «موازنتلی سیاست» اساسیده هندستان بیلن مناسبتلرگه اهمیت بېریشینی ایتگن.
اونینگ قۉشیمچه قیلیشیچه، افغانستان و هندستان اۉرته‌سیده‌گی سودا حجمی آرتیب بارماقده. ایکّی تامان نینگ امکانیتلریدن ماکسیمال درجه‌ده فایده‌لنیش اوچون حکومت و خصوصي سکتورلر اۉرته‌سیده‌گی علاقه‌لر همده همکارلیکنی کېنگه‌یتیریش ضرور.
یتین پتیل هندستان افغانستان بیلن اقتصادي، سیاسي و گومانیتار ساحه‌لرده اۉزارا علاقه‌لر و مناسبتلرنی کېنگه‌یتیریشنی ایستشینی بیلدیرگن.
طالبلر هندستان بیلن مستحکم مناسبتلر اۉرنه‌تگن. گرچه هندستان حلی هم طالباننی رسماً تن آلمه‌گن بۉلسه-ده، افغانستان نینگ ینگی دهلیده‌گی اېلچیخانه‌سینی اوشبو گروهگه تاپشیرگن.
طالبلر پاکستان بیلن حربي تۉقنه‌شوولر و اقتصادي علاقه‌لرنینگ اوزیلیشیدن سۉنگ هندستانگه کۉپراق یقینلشدی. شونینگدېک، دهلی بیلن سودا علاقه‌لرینی یۉلگه قۉییش مقصدیده ایران جَنوبیده‌گی چابهار بندریگه سرمایه کیریتیشگه اعتبار قره‌تماقده
