آق اوی مطبوعات سۉزلاوچیسی کارولین لیویتنینگ ایتیشیچه، ایران امریکا بیلن مذاکرهلرنی دوام اېتتیرماقده و ایکّی تامان کېلیشووگه اېریشیشنی ایستهماقده.
لیویت بوگون (پنجشنبه، ۲۵-سرطان) اۉتکزیلگن مطبوعات انجمنیده ایران و امریکا اۉرتهسیدهگی اوروش حقیدهگی سوالگه جوابن شوندهی دېدی: «مېن بوندن بیر ساعت آلدین جمهور رییس بیلن بو مسألهده گپلشدیم. ایران امریکا بیلن مذاکرهلرنی دوام اېتتیرماقده و بیز بیلن کېلیشووگه اېریشیشنی ایستهماقده، چونکه او جوده آغیر ضربهلرگه اوچرهدی.»
ایران رسميلری حاضرچه آق اوی مطبوعات سۉزلاوچیسی نینگ بو دعواسیگه مناسبت بیلدیرمهگن.
کرالین لیویتنینگ قۉشیمچه قیلیشیچه، امریکانینگ سۉنگگی کونلردهگی ایران حدودیگه بېرگن ضربهلری ایران اوروشنی توگهتیش بۉییچه امضالنگن کېلیشوونی بوزگنیدن کېین عملگه آشیریلگن.
او شوندهی دېدی: «اولر امضالهگن کېلیشووگه کۉره، هرموز بۉغازیدن اۉتهیاتگن تجارت کېمهلریگه اۉق اوزمسلیکلری کېرهک اېدی. افسوسکی، اولر بوندهی ایشنی قیلیشدېک اچینرلی قرار قبول قیلدیلر.»
لیویتنینگ تأکیدلشیچه، جمهور رییس دونالد ترامپ هرموز بۉغازیده صادر اېتیلگن بو «ترورچیلیک حرکتلری»گه جیم قرهب اۉتیرهدیگن انسان اېمس و ایران بو حرکتلری عاقبتلریگه البته دوچ کېلیشینی تأمینلهیدی.
ایران و اقش ۱۷-جون کونی پاکستان واسطهچیلیگیده کېلیشوونی امضالب، برچه جبههلرده بیر-بیریگه قرشی اوروشنی تۉختهتیشگه کېلیشیب آلگن اېدی.
بیراق، سۉنگگی کونلرده هرمز بۉغازینی باشقریش مسألهسیدهگی کېلیشماوچیلیکلر سبب ایکّی تامان ینه اۉز ارا هجوملرنی باشلهدی. بو هجوملر کېنگ کۉلملی اوروش قَیته باشلنیشی ممکنلیگی حقیدهگی خواطرلرنی کوچهیتیرماقده.
