کابل شهریده ۲۹ میزان – اۉزبېک تیلی ملي کونی مناسبتی بیلن تدبیر اۉتکزیلدی. اونده اۉزبېکستان‌نینگ کابل‌ده‌گی اېلچیخانه‌سی وکیلی، شونینگدېک، بیر قنچه شاعرلر، یازووچیلر، فرهنگ فعاللری، مدنی جماعه‌چیلیک فعاللری، یاشلر و خاتین-قیزلر اشتراک اېتدی.
محفل‌ده سۉزگه چیققنلر اۉزبېک تیلی‌نینگ افغانستاندهگی اۉزبېکلرنینگ تیل و مدني اۉزلیگینی اسره‌شده‌گی اهمیتیگه اورغو بېریب، حکومتلرنی اوشبو تیلنی قۉللب-قوّتلش، رواجلنتیریش، تعلیم و ترغیباتیگه کۉپراق اعتبار قره‌تیشگه چقیردیلر.
اشتراکچیلر افغانستاندهگی تیل و مدني خیلمه-خیللیکنی تأکیدلب، مملکتده‌گی تورلی تیللرنی اسره‌ش و اولرگه حرمت بیلن مناسبتده بۉلیشنی خلقلر اۉرته‌سیده‌گی تاتوولیک و ملي بیرلیکنی مستحکملش‌نینگ مهم عامللریدن بیری صفتیده بهاله‌دیلر.
محفل دوامیده بیر گروه شاعرلر اۉز شعرلرینی اۉقیب بېردیلر. شونینگدېک، اۉزبېکلرنینگ ملي طعاملری نمایش اېتیلدی. بوندن تشقری، اۉزبېک تیلی و مدنیتیگه عاید ینگی نشر اېتیلگن بېش عنوان کتاب تقدیم اېتیلیب، کۉرگزمه‌گه قۉییلدی.
تدبیر یکونیده تشکیلاتچیلر تامانیدن قطعنامه قبول قیلینیب، اونده اۉزبېک تیلینی قۉللب-قوّتلش، اۉزبېکلرنینگ مدني میراثینی اسره‌ب-اوه‌یلش همده کۉپراق اعتبار قره‌تیش ضرورلیگی تأکیدلندی.
