اطلاعات روز: حامد کرزی، رییس جمهوری کشور در واکنش به کشته شدن کارمندان ریاست جمهوری در انفجار ماین گفته است، هدف قرار دادن افراد بی‌گناه و کارمندان ملکی دولت، عمل خلاف تمامی ارزش‌های دینی و انسانی است که به هیچ‌وجه قابل توجیه نمی‌باشد.
او گفته است، دشمنان افغانستان به اشاره‌ی بیگانگان در ماه رمضان با وسیله قرار دادن نام اسلام همه‌روزه به کشتار افراد ملکی دست می‌زنند. رییس جمهور کرزی به ارگان‌های امنیتی دستور داده تا در مورد چگونگی وقوع این حمله‌ی تروریستی تحقیقات لازم را انجام دهند.
دو کارمند ریاست جمهوری دیروز در انفجار ماین کنار جاده در حوزه‌ی دوازدهم شهر کابل کشته شدند. این افراد کارمندان بخش مطبوعاتی ریاست جمهوری بوده‌اند. در این رویداد پنج کارمند دیگر دفتر مطبوعاتی ریاست جمهوری زخمی شده و در حال حاضر در شفاخانه بستری اند.
حشمت استانکزی، سخن‌گوی فرماندهی پولیس کابل میگوید، موتر نوع فلانکوچ حامل کارمندان دولتی صبح روز سه‌شنبه در مربوطات حوزه‌ی دوازدهم شهر کابل با انفجار ماین کنار جاده برخورد کرده است. هنوز هویت قربانیان این رویداد اعلام نشده، اما پولیس میگوید، قربانیان این رویداد کارمندان بخش مطبوعاتی ریاست جمهوری بودند که از خانه به طرف محل کارشان در حرکت بودند.
طالبان مسلح مسئولیت این انفجار را بر عهده گرفته و ادعا کرده است که در این رویداد تلفات سنگینی به کارمندان ریاست جمهوری وارد شده است. حامد کرزی، رییس جمهوری کشور حمله‌ی تروریستی بالای موتر حامل کارمندان ملکی دفتر ریاست جمهوری را به شدیدترین الفاظ محکوم کرده است.