افغانستان و تاجیکستان 5 موافقت‌نامه‌ی هم‌کاری امضا کردند

اطلاعات روز: افغانستان و تاجیکستان 5 موافقت‌نامه‌ی هم‌کاری را در بخش‌های گمرکات، تشویق سرمایه‌گذاری، فرهنگ و هنر به امضا رساندند. توافق‌نامه‌ی یاد شده دیروز بین سران افغانستان و تاجیکستان در کابل امضا شدند و پس از امضای آن، رییسان جمهور دو کشور یک نشست خبری برگزار کردند.
حامد کرزی در این نشست گفت که با رییس جمهور تاجیکستان در مورد روابط دو کشور در عرصه‌های تجارت، اقتصاد، مواصلات، احداث جاده‌ها و خط آهن گفت‌وگو کرده است. او افزود که افغانستان و تاجیکستان در ۱۲ سال گذشته به عمق روابط خود رسیدند و در حال حاضر دو کشور روابط بسیار عمیق و گسترده دارند.
به دنبال آن، امام علی رحمان، رییس جمهور تاجیکستان گفت که کشورش خواهان مشارکت وسیع‌تر افغانستان در هم‌کاری منطقه‌ای و سازمان هم‌کاری شانگ‌های است. او افزود که کشورش امسال ریاست سازمان هم‌کاری شانگ‌های را به‌دوش دارد و در تقویت نقش افغانستان در این سازمان تلاش خواهد کرد.
رحمان تأکید کرد که با حامد کرزی در مورد بررسی و تعیین راه‌ها، شیوه‌های گسترش و رشد همه‌جانبه‌ی مناسبات دوستانه‌ی دو کشور بحث کرده است. او هم‌چنان افزود که کشورش در تطبیق پروژه‌ی کاسا و پروژه‌ی راه آهن میان تاجیکستان، افغانستان و ترکمنستان تلاش خواهد کرد.
رحمان از گسترش هم‌کاری‌ها میان افغانستان و تاجیکستان در بخش‌های زیربنایی، اقتصاد، تجارت، معارف، فرهنگ و هنر نیز خبر داد. رییس جمهور تاجیکستان هم‌چنان گفت که با حامد کرزی روی تقویت بیش‌تر روابط ساختارهای امنیتی مرزی و نظامی دو کشور گفت‌و‌گو کرده است.
امام علی رحمان، رییس جمهور تاجیکستان دیروز در رأس یک هیأت‌ عالی‌رتبه‌ به منظور اشتراک در جشن جهانی نوروز در یک سفر رسمی وارد کابل شد. افغانستان امسال میزبان جشن جهانی نوروز می‌باشد و قرار است امروز (پنج‌شنبه، 7 حوت) با حضور رییس جمهوران کشورهای منطقه در ارگ ریاست جمهوری برگزار شود.