طالبانو د جنرال رازق له مقبرې د موټرو تم ځای جوړ کړی

اطلاعات روز:د کندهار د پخواني امنيه قوماندان جنرال عبدالرازق اڅکزی له مقبرې څخه اوس د موټرونو تمځای جوړ شوی چې ورسره يو وخت یې د ګڼ شمېر پخواني سياستوالو غبرګونه هم راپارولي دې.

د جنرال رازق ورور عبدالخالق اڅکزي پر خپل رسمي فيسبوک پاڼه باندې د خپل ورور د مقبرې عکسونه خپاره کړي او ورسره يې ليکلي چې د جنرال عبدالرازق د زيارت له انګړ څخه اوس د موټرونو پارکينګ جوړ شوی.

هغه د طالبانو دغه ډول کړنې «توهين اميزه» او «غيري اسلامي» بللي او زیاتوي چې داسې کارونه به د افغانانو ترمنځ نور هم بې اتفاقي رامنځته کړي.

هغه طالبانو ته ګوت څنډنه کړې او ویلي یې دي، چې طالبان به د خپلو ټولو ناوړه کړنو پور ادا کوي او په راتلوونکي کې به د هر ډول منفي حرکت په بدل کي د‌ ‌دوی د سخت غبرګون سره مخ شي.

د‌ کندهار د‌ پخواني امنيه قوماندان ورور وايي، چې دوی او ملګري يې ارام ندي ناست او پر يو داسې تګلاره کار کوي چې د هرې ممکنې لارې ولس سره په ګډه خپله مبارزه پېل کړي.

په همدې حال کې په ولسي جرګې کې د کندهار پخوانی استازی حمیدزی لالی هم د طالبانو دغه ډول کړنې غندې او وايې چې د دوی له پاره د منلو وړ نه دي.

هغه وايې، چې د طالبانو دغه ډول کړنې دوی او ملګرو ته یې د قبول وړ ندي او ډېر ژر به د طالبانو دغه ډول کړنو ځواب ورکړي.

و مو غوښتل چې په دې اړه کندهار کې د طالبانو د مسوولينو نظر هم له ځان سره ولرو خو له ډېرو هڅو سره بیا هم بريالي نه شولو.

وروسته له هغې چې د احمدشاه مسعود مقبرې ته څیرمه د طالبانو اټن کول په کور دننه او بهر پراخ غبرګونونه را وپارول اوس د جنرال رازق مقبرې ترڅنګ د موټرو تم ځای جوړیدل د سختو نیوکو سره مخ شوی.