اطلاعات روز: لغمان کې ولایتي مسوولین وایي، د دې ولایت علیشنګ ولسوالي کې د هاوان مرمۍ لګېدو له امله د یوې کورنۍ درې تنه وژل شوي او ۹ نور ټپيان شوي دي.
د لغمان د والي ویاند اسدالله دولتزي نن (دوشنبه، ۲۴ لیندۍ) اطلاعات روز ورځپاڼې سره په خبرو کې وویل، تیره ورځ ناوخته د علیشنګ ولسوالۍ اړوند اسلام اباد کلي کې وسله والو طالبانو پر افغان ځواکونو بریدونه کړي.
د ښاغلي دولتزي په وینا، د وسله والو طالبانو له لوري په دغو بریدونو کې د دې ډلې د هاوان یوه مرمۍ د علیشنګ ولسوالۍ په اسلام اباد کې د ملکي وګړو پر یوه کور لګیدلې چې له امله یې د یوې انجلۍ په ګډون درې تنه وژل شوي او ۹ نورټپیان شوي دي.
دولتزی همداراز وایي، چې د یادې نښتې پر مهال د افغان ځواکونو په بریدونو کې د وسله والو طالبانو مهم غړی عبدالملک وژل شوی او ګڼ شمیر نور ټپیان شوي دي.
دولتزی زیاتوي: «تیره ورځ وسله والو طالبانو پر افغان ځواکونو بریدونه کړي چې په شاه تمبول شوي، چې پر مهال یې وسله والو طالبانو د هاوان یوه مرمۍ د ملکي وګړو په کور توغولې چې له امله یې یوه انجلۍ او دوه نارینه وژل شوي او ۹ نور ټپیان شوي دي.»
وسله والو طالبانو تراوسه په دې اړه څه نه دي ویلي.