اطلاعات روز: ارزګان کې افغان سرې مياشتې ټولنې ۲۰۰۰ سیلاب ځپلو کورنیو ته خوراکي او ۱۵ کورنیو ته غیرې خوراکي توکي ویشلي دي.
د افغان سرې مياشتي مطبوعاتي مسوول عبدالواحد حليمي وايي، چې دغه مرستې يې هغو کسانو ته ورکړي کوم چې د ورستيو سيلابونو پر مهال زیانمن شوي وو.
هغه وايي په دغه مرستو کې خېمې، کمپلې، د اوبو ډبي، يو ترپال او همداراز وچه ډودۍ او ملايي شامله وه.
نوموړی زیاتوي، چې د ارزګان په خاص ارزګان ولسوالۍ کې د ورستيو سيلابونو له امله ۵۰۰ کورونه هم له منځه تللي دي.
د ده په خبره: «افغان سرې میاشتې ټولنې د ارزګان ولایت په خاص ارزګان ولسوالۍ کې ۱۵ کورنیو ته غیري خوراکي مواد او ۲۰۰۰ سېلاب ځپلو کورنیو ته وچه ډوډۍ او ملایي وویشله، د ارزګان ولایت د خاص ارزګان ولسوالۍ د آب فران نومې سیمه کې د سختو سېلابونو راوتلو له امله خلګو ته په زیات شمېر مالي او ځاني زیانونه اوښتې دي، چې شاوخوا ۵۰۰ کورونه اوبو تخریب کړي او د استوګنې نه دي.»
ورته مهال د خاص ارزګان ولسوالۍ څخه په خپرو شويو ويډيو ګانو کې خلک ادعا کوي چې د ورستيو سيلابونو له امله دوی ته په زيات شمير زيانونه اوښتي دي او لاهم تر شنه اسمان لاندي ژوند کوي.
يوه د پاخه عمر لرونکي ميرمن غوښتنه کوي چې له دوی سره دې مرستې وشي.
دارزګان د ولايت مقام څخه په خپره شوې خبرپاڼه کې راغلي چې د ارزګان کې د طالبانو مرستيال والي حاجي مزمل او د دغه ولایت امنیې قومندان ملابشير خاص ارزګان ولسوالۍ ته سفر کړی او هلته يې زيانمن شوو کسانو ته خوراکي او غيرې خوراکي توکي ويشلي دي.
د افغانستان د هوا پیژندنې ادارې په راتلوونکو څو ورځو کې بیا هم په ځینو ولایتونو کې د باران او سیلابونو راوتو اټکل کړی دی.