اطلاعات روز: د پکتیا ولایت په ډنډپټان ولسوالۍ کې ځايي سرچینې وایي، چې ډیورنډ فرضي کرښې ته څېرمه د پاکستاني پوځیانو له لوري پر افغان مسافرو ډزې شوي، چې له امله یې دوه کسان وژل شوي او درې نور ټپیان دي.
د سرچینې په حواله پېښه د تېرې جمعې په ورځ (۷ د زمري) هغه مهال رامنځته شوه، چې د افغان مسافرو د ځورونې له امله د طالبانو سرحدي کسانو او پاکستاني پوځیانو ترمنځ لومړی فزیکي برخورد رامنځته شو.
له تېرو دریو ورځو راهیسې د ډنډپټان او پاړاچینار ترمنځ لاره د مسافرو د تګ-راتګ پر مخ تړل شوې او له کرښې پورې غاړې لاهم ګڼ افغانان بند پاتې دي.
پورې غاړه په صده سیمه کې یو افغان چې ځان یې وسیم معرفي کاوه اطلاعات روز ته په رالېږل شوي پیغام کې ویلي، چې د پاکستاني پوځیانو له لوري افغانانو ته اجازه نه ورکول کیږي، تر څو خپل هیواد ته ستانه شي.
په سیمه کې د طالبانو امنیتي مسوولینو تر اوسه د رامنځته شوې ستونزې او په کې افغان لوري ته د اوښتې مرګ ژوبلې په اړه رسنیو ته څه نه دي ویلي.
دا پېښه په داسې مهال رامنځته کیږي، چې څو ورځې وړاندې د طالبانو د دفاع وزارت سرپرست ملا یعقوب پکتیا ته په سفر کې له ډیورنډ فرضي کرښې د لیدنې پر مهال له پاکستان سره پر پوله د ښو اړیکو جوړېدو یادونه کړې وه.