طالبانو د کابل د ښوونې او روزنې په پوهنتون کې د محصلینو له خوا ټولګي ته د موبایل وړل منع کړي دي.
یوه سرچینه نن (سهشنبه، د وږي ۳مه) وویل، چې دغه محدودیت د نوي سمستر له پیل سره وضع شوی دی. د سرچینې په وینا، هغه محصلین چې له ځان سره موبایل ولري، باید د پوهنتون په دروازه کې خپل موبایل وسپاري او د رخصتېدو پر مهال یې بېرته واخلي.
طالبانو د ښوونیزو او تحصیلي مرکزونو په ګډون په دولتي ادارو کې د کارکوونکو له خوا د هوښیار موبایلونو کارول هم منع کړي دي.
په یوه خصوصي پوهنتون کې یوې بلې سرچینې وویل چې طالبانو د دغه پوهنتونونو د کارکوونکو موبایلونه هم راټول کړي دي.
د محصلینو پر لباس محدودیتونه
سرچینه وايي، طالبانو د محصلینو پر لباس هم محدودیتونه لګولي دي.
د سرچینې په وینا، طالبانو د کابل د ښوونې او روزنې پوهنتون محصلینو ته ویلي چې له دې وروسته باید سپینې جامې واغوندي او لونګۍ پر سر کړي. ږیره پرېښودل او خولۍ اغوستل هم په ښوونیزو او تحصیلي مرکزونو کې د دې ډلې له نورو محدودیتونو څخه دي.
په دې وروستیو کې د هرات پوهنتون د طب پوهنځي ۱۱ استادانو د طالبانو د امر بالمعروف ځواکونو د «سپکوونکي» چلند په اعتراض کې استعفاوې ورکړې.
دوی په یوه ګډ لیک کې د خپلو استعفاوو د اعلان پر مهال ویلي وو چې د طالبانو د امر بالمعروف ځواکونو د استادانو د لنډې ږیرې له امله هغوی زنداني کړي دي.
د طالبانو مشر ملا هبتالله په دې وروستیو کې د یوه فرمان په صادرولو سره ویلي چې د ادارو کارکوونکي باید یوه قبضه ږیره ولري او تر دې کمه ږیره «تعزیر» لري.
ملا هبتالله همداراز ویلي چې هغه کارکوونکي چې سیرت او صورت یې د شریعت خلاف وي، باید له دندې وځنډول شي، معاش یې وځنډول شي او له دندې ګوښه شي.
په فرمان کې راغلي چې د ادارو کارکوونکو ته باید د لمانځه زدهکړه ورکړل شي او هغوی باید د جماعت د لمانځه پر مهال لونګۍ پر سر ولري.
