د پکتیا سیمه ییز چارواکي د دغه ولایت په احمدابا او سیدکرم ولسوالیو کې د کلیو د بیارغونې او پراختیا وزارت له لوري د څه باندې ۱۵ میلیونه افغانیو په لګښت د دوو پراختیايي پروژو د پیل خبر ورکوي.
د پکتیا د کلیو د بیارغونې او پراختیا ریاست لپاره د طالبانو رییس مولوي عنایتالرحمن نن (سه شنبه، ۳ د وږي) د یادو پروژو د چارو د پیل پر مهال ویلي، یوه پروژه د احمدابا ولسوالۍ په «وچ غړک» سیمه کې د اوبو د یوه ذخیروي چکډیم او بله هغه یې د سیدکرم ولسوالۍ د «خانانخېلو» په کلي کې د یوه اوسپنیز کانکریټي پل جوړول دي.
د هغه په وینا، د وچ غړک چکډیم به ۶۰ متره اوږدوالی او اووه متره لوړوالی ولري او د سیدکرم ولسوالۍ پل به ۱۸ متره اوږدوالی ولري.
نوموړی زیاتوي، د دغو پروژو ټول لګښت د د کلیو د بیارغونې او پراختیا وزارت له بودجې ورکول کېږي او ټاکل شوې د دواړو پروژو چارې په شپږو میاشتو کې بشپړې شي.
د هغه د مالوماتو له مخې، د پکتیا په بېلابېلو ولسوالیو کې د ۱۸ نورو پروژو سروې هم بشپړه شوې او تمه ده چې د یادو پروژو د جوړولو چارې هم په راتلونکي کې پیل شي.
بلخوا ولسي خلک د دغو پروژو له پیل هرکلی کوي او وایي، د چکډیم په جوړېدو به د سېلابونو اوبه مهار او کرنیزې ځمکې به یې خړوبې شي او د پل په جوړېدو سره به د سیمې د اوسېدونکو د تګ راتګ ستونزې تر یوه بریده هوارې شي.
