اطلاعات روز: د هرات پوهنتون يو شمېر ښځينه محصلانو د کابل په لوېديځ کې د کاج پر ښوونیز مرکز د بريد په غبرګون کې لاريون وکړ.
دوی نن (یکشنبه، ۱۰ د تلې) د هرات پوهنتون مخې ته په یوې راټولیدنه کې د «تعلیم او امنیت»، «مه وېرېږئ، مه ویریږئ، موږ ټول له یوبل سره یو» او « پورته شه، پاڅون وکړ، جهالت پای ته ورسوه» شعارونه ورکول.
اطلاعات روز ته په استول شويو ويډيوګانو کې ليدل کېږي، چې طالبان د محصلو نجونو د مظاهرې مخه په هوايي ډزو سره نیولې ده.
دې ډلې پرون په کابل کې هم د ښځو د لاریون مخه نیولې او یو شمیر نجونې یې د وهلو ډبولو وروسته نیولي او بندیانې کړي دي.
دوی د کاج پر ښوونیز مرکز د برید په غبرګون کې لاریون کړی و، او د «نسل وژنه جرم دی، چوپتیا خیانت دی»، «له جهالت څخه ستړې شوې یو، عدالت، عدالت»، «د هزاره ګانو نسل وژنه بنده کړئ»، «زور زیاتي ته نه» او د «پرمختګ پر لور تګ» شعارونه یې ورکول.
د ښځو د اعتراضونو ځپلو هم غبرګونونه راپارولي دي.
د ملګرو ملتونو سیاسي دفتر (یوناما) د کابل په لویدیځ کې د طالبانو له خوا د ښځو د اعتراضونو ځپل د اندېښنې وړ بللي دي.
یوناما ویلي، چې ښځینه لاریون کوونکې له تاوتریخوالي سره مخامخ شوي دي.
دغه دفتر له طالبانو غوښتي چې د ټولو افغانانو حقونه خوندي کړي او د سوله ییز لاریون د مخنیوي لپاره وسله ونه کاروي.
افغانستان کې د ښځو لپاره د امریکا ځانګړې استازې رینا امیري ویلي، د طالبانو لخوا له لاریونکوونکو میرمنو سره زور زیاتی او «وحشیانه» کړنه د دې ډلې د زور او ځواک نه بلکې د کمزورۍ نښه ده.
د تېرې جمعې په ورځ (۸ د تلې) دوه ځانمرګو بریدګرو د کابل په لویدیځ کې د کاج تعلیمي مرکز په نښه کړ.
د اطلاعات روز ورځپاڼې د ورستیو شمېرو له مخې په دغه برید کې د ۴۳ نجونو په ګډون ۴۹ تنه وژل شوي او ۹۷ تنه نور ټپیان شوي دي.
تر اوسه کومې ډلې د دې برید مسوولیت نه دی منلی.