اطلاعات روز: افغانستان کې د ملګرو ملتونو د معاونت دفتر (يوناما) له طالبانو غوښتي چې د ظریفې یعقوبي په ګډون د ښځينه حقونو فعالانې سمدستي ازادې کړي.
د دې دفتر په وينا، چې د ښځینه حقونو پنځه فعالانې له تېرې يوې مياشتې راهيسې د طالبانو په زندان کې دي.
يوناما نن (شنبه، ۱۲ د لیندۍ) په يوه ټويټ کې ويلي، چې د دې ښځو کورنۍ له دوی سره د ليدنې اجازه نه لري.
يوناما وايي، چې د ښځینه حقونو پر فعالانو د شته تورونو او يا هم د هغوی د نيول کېدو په اړه هيڅ واضح معلومات نه شته.
طالبانو ظريفه يعقوبي چې يوه له اعتراض کوونکو ښځو څخه وه، د کابل په لوېديځ کې د يوه خبري کانفرانس پر مهال له څلورو نورو نارينه همکارانو سره ونيوله.
د يعقوبي تر نيول کېدو وروسته راپور ورکړل شو چې طالبانو فرحت پوپلزۍ، زينب رحيمي او حميرا يوسف هم نيولې دي، دوی هم معترضې ښځې وې.
طالبانو د دې اعتراض کوونکو ښځو د نيونې په اړه څه نه دي ويلي.
په افغانستان کې واک ته د طالبانو له رسيدو راهيسي ښځې او نجونې له خپلو ابتدايي حقوقو او ازاديو بې برخې شوې دي.
د طالبانو تر حاکميت لاندې ښځې په دولتي ادارو کې کار نه شي کولای او همدا راز نجونې نه شي کولای چې تر شپږم ټولګي پورته زده کړې وکړي.
د طالبانو دا بنديزونه د ښځو د اعتراضي خوځښتونو لامل شوي دي، خو طالبان هڅه کوي چې ښځې وځپي. په وروستيو څو اونيو کې ګڼې اعتراض کوونکې ښځې زنداني يا هم ورکې شوې دي.
