اطلاعات روز: د لغمان د کرنې ریاست مسولین وایي، چې سږکال په دې ولایت کې د ممپلیو په حاصلاتو کې د پام وړ زیاتوالی راغلی دی.
د دغه ولایت لپاره د طالبانو د کرنې رییس محمد ولي وایي، چې اوسمهال د لغمان په مرکز مهترلام، قرغیو، الینګار او یو شمیر نورو ولسوالیو کې کروندې ډېرې شوي او د ممپلیو کرکېلي ته د بزګرانو لېوالتیا هم زیاته شوې ده.
محمد ولي زیاتوي:« سږکال لغمان کې په شپږ هکتاره ځمکه ممپلي کرل شوي او حاصلات یې هم دولس ټنه لوړ شوي چې تېر کال شپږ ټنه وو او لا هڅه کې یو بزګران یې کرلو ته وهڅوو.»
نوموړی همداراز وایي، د لغمان خاوره اوبه او هوا د ممپلیو کرکېلي، پالنې او روزنې ته مناسبه ده او لا هڅه کوي، چې د دغه ولایت نورو ولسوالیو ته هم د ممپلیو کرکیله وغځوي.
هغه وایي، د هیواد ممپلي د کورني بازار تر څنګ په نړیواله کچه هم ښه بازار او مناسبه بیه لري، چې په دې وروستیو کلونو کې یې په دې ولایت کې کرکېله مخ پر وده ده.
بل لور ته یو شمیر کرونده ګر هم د ممپلیو سږنیو حاصلاتو ته خوښ دي.
د لغمان یوه بزګر میرزا ګل چې په دوه جریبه ځمکه یې ممپلي کرلي وایي، چې پدې وروستیو کلونو کې یې د ممپلیو کرلو ته د دهقانانو پام زیات شوی او په وينا یې د نورو کښتونو په پرتله یې ګټه ښه ده او د کوکنارو په نسبت یې زحمت هم کم دی.
میرزاګل زیاته کړه:« له حکومت غواړو چې له مونږ سره دې مرسته وکړي ځکه څه ډول چې لازمه ده له دهقانانو سره مرسته نه ده شوې؛ د اوبو ستونزه ډیره ده او سږکال زمونږ فصلونه سیلابونو هم خراب کړل.»
د کرنې د برخې پوهانو په اند، که حکومت په دغه ولايت کې د کروندګرو لاسنيوی وکړي او د کرنيزو حاصلاتو د ساتنې لپاره يې معياري سړې خونې جوړې کړي، تر ډېره به د کال په ټولو موسمونو کې د هېوادوالو د کرنيزو محصولاتو اړتياوو ته رسېدنه وکړای شي.
لغمان د هېواد په ختيځ کې يو له هغو ولايتونو دی چې د کروندګرو د لاسي خواريو حاصلات يې د دې ولايت ترڅنګ د هېواد بېلابېلو ولايتونو اوسېدونکو ته رسېږي، خو سږکال يې کروندګر شکایت کوي، سیلابونو یې حاصل ته رسیدلي فصلونه له منځه وړي او له حاصلاتو راضي نه دي.
