اطلاعات روز: د افغانستان په چارو کې د امريکا ځانګړي استازي توماس وېسټ د طالبانو له لوري د نجونو د زده کړو ځنډولو په اړه ويلي، چې نړۍ بايد په متحده توګه د طالبانو ددې سياست مخالفت وکړي.
هغه نن (چهارشنبه، ۳۰ د لیندۍ) د ټويټونو په يوه لړۍ کې ويلي، چې نړيواله ټولنه بايد د افغان ښځو ترڅنګ ودرېږي.
وېسټ ليکلي، چې طالبانو د افغان ښځو پر ژوند نوي او نه توجيه کېدونکي بنديزونه لګولي دي.
نموړي زیاته کړې، چې دا شېبه د ده فکر له هغو خویندو، نجونو او ميندو سره دی چې د خپلې کورنۍ د ملاتړ لپاره زده کړې کوي او د خپلو ارمانونو د پوره کولو په لټه کې دي.
ويسټ ليکلي: «دا د نړۍ لپاره مهمه شېبه ده؛ موږ بايد سره يو شو او له دې سياستونو سره په ټينګه مخالفت وکړو. موږ بايد د افغان ښځو په څنګ کې ودرېږو.»
د طالبانو د لوړو زده کړو وزارت د سېشنبې په ورځ اعلان وکړ چې د کابينې د پرېکړي او د دې ډلې د لوړو زده کړو د سرپرست وزير مولوي ندا محمد نديم د امر پر اساس، په پوهنتونو کې د نجونو زده کړې تر امر ثاني پورې «ځنډيدلې» دي.
دې تصميم ګڼ غبرګونونه را پارولي دي. وړاندې په کابل کې د المان سفارت، بريتانيا، د بشر حقونو څار سازمان، د افغانستان لپاره د ملګرو ملتونو د بشري حقونو ځانګړي راپورچي، د ملګرو ملتونو سرمنشي او نورو هم دې تصميم ته غبرګونونه ښودلي دي.
دا په داسې حال کې ده چې د تېر لمریز کال د زمري په میاشت کې طالبانو د افغانستان واک تر لاسه کړی، دغې ډلې له شپږم ټولګي پورته نجونې هم له ښوونځیو منع کړې دي. له بيا – بيا ژمنو سره – سره یې نجونو ته اجازه نه ده ورکړې چې ښوونځيو ته ولاړې شي.