اطلاعات روز: د طالبانو له لوري د نجونو پر لوړو زده کړو تر بنديز وروسته، دې ډلې محصلې نجونې نه دي پرېيښې چې کابل پوهنتون ته ننوزي.
پر ټولنيزو رسنيو په خپرو شويو انځورونو کې ليدل کېږي چې نجونې د پوهنتون مخې ته راټولې شوې دي.
يوه ويډيو چې ويل کېږي د کابل پوهنتون په يوه دروازه کې ثبت شوې، د نجونو د ژړا غږ پکې اورېدل کېږي او هغوی يوه – بله په غېږ کې نيسي.
د روان کال په وري/حمل مياشت کې هم تر شپږم ټولګي پورته نجونو د ښوونځیو د دروازو په مخ کې اوښکې توی کړې او بيرته کورونو ته وګرزيدې.
د طالبانو د لوړو زده کړو وزارت د سې شنبې په ورځ اعلان وکړ چې د کابينې د پرېکړي او د دې ډلې د لوړو زده کړو د سرپرست وزير مولوي ندا محمد نديم د امر پر اساس، په پوهنتونو کې د نجونو زده کړې تر امر ثاني پوري «ځنډيدلې» دي.
دې ډلې په کابل او ځينو ولايتونو کې خصوصي ښوونيز مرکزونه هم د نجونو پر مخ تړلي او نجونې يې نه دي پرېيښې چې دې کورسونو ته ننوزي.
