اطلاعات روز: د ننګرهار پوهنتون د طب پوهنځي محصلینو نن (چهارشنبه، ۳۰ د لیندۍ) د طالبانو د لوړو زده کړو وزارت د هغه پرېکړې په غبرګون کې لاریون کړی چې لهمخې يې پوهنتونونو کې د ښځینه محصلانو زده کړې ځنډیدلي دي.
ددغه پوهنتون د طب پوهنځي نارینه او ښځينه محصلینو د ازموینې صحنه ترک کړې او د لوړو زده کړو وزارت وروستۍ پریکړه یې غیرعادلانه بللې ده.
په ټولنیزو رسنیو کې په خپرو شویو ویډیوګانو کې هم لیدل کېږي چې دننګرهار طب پوهنځي محصلین د پوهنځي په داخل کې راټول شوي او هغه شعارونه یې هم په لاس کې نیولي چې پکې له طالب چارواکو د نجونو پرمخ د ښوونځيو او پوهنتونونو د پرانیستل کیدو غوښتنه شوې.
د طب پوهنځي یو محصل چې نه یې غوښتل نوم یې خپور شی وایي، چې نن سهار د پوهنځي ټولو محصلینو د لوړو زده کړو وزارت د وروستۍ پریکړې په غبرګون کې د ازموینې صحنه د اعتراض په ډول پریښې ده.
نوموړی وایي، اعتراض کوونکو محصلینو لومړی د پوهنځي په داخل کې راټول شوي وو او بیا یې د څو شیبو لپاره د طب پوهنځي مخې ته راوتلي وو.
د اعتراض کوونکو یو بل ګډونوال چې نه غواړي نوم یې خپور شي وایي، چې اعتراض کوونکو محصلینو د لوړو زده کړوزارت غوښتي، چې خپله پرېکړه بېرته واخلي او د افغان نجونو پر مخ دې د پوهنتونو دروازې پرانېزي.
بلخوا د ننګرهار پوهنتون مسوولین بیا ردوي چې ګوندې محصلینو دې د لوړو زده کړو وزارت د وروستۍ پریکړې په غبرګون لاریون کړی وي.
د یادونې وړ ده، چې تازه د لوړو زده کړو وزارت په یوه مکتوب کې د هېواد خصوصي او دولتي پوهنتونونو ته تر امر ثاني پورې د نجونو پر تګ بندیز لګولی.
د دې ترڅنګ له شپږم ټولګی پورته نجونو پرمخ هم شاوخوا ۴۵۰ ورځې کېږې چې د ښوونځیو دروازې تړلي او لا یې هم د پرانیستل کېدو څرک نه معلومېږي.
