اطلاعات روز: د بلخ او فارياب ولايتونو د مرکزو مزارشريف او ميمنې ښارونو اوسېدونکي وايي، چې د طالبانو له لوري په پوهنتونونو کې د نجونو د زده کړو تر ځنډولو وروسته، دا ډله په دې دوو ښارونو کې تيته شوې ده.
د سرچينو په وينا، طالب ځواکونو نن سهار (چهارشنبه، ۳۰ د لیندۍ) د ښځو په ګډون د مزار شريف اوسېدونکي تر څار لاندې نیولي. همدا راز له ميمنې ښار څخه هم سرچينې وايي، چې طالبان د دې ښار په ټولو څلورلارو کې په پراخه کچه موجود دي.
د مزار شريف د اوسېدونکو په وينا، د طالبانو د دې کار لامل د اعتراضي غونډو مخنیوی کول دي.
د مزار شريف يو شمېر اوسېدونکي چې نه غواړي نوم يې واخيستل شي وايي، طالبان بلخ پوهنتون ته پر غځيدلې لار، د سخي روضې شاوخوا او د ښار په نورو سيمو کې له پوځي موټرونو او سپکو او درنو وسلو سره حضور لري.
په عين حال کې له مزار شريف څخه ځيني ښځې وايي، چې طالبان ښځې له مسافر وړونکو موټرو راکوزوي.
د سرچينو په وينا، طالبان ښځې او نجونې د پوهنتونو او ښوونيزو مرکزونو له لارو څخه را ګرزوي.
کيميا (مستعار) د مزار شريف د اوومې ناحيې اوسيدونکې اطلاعات روز ته وويل، چې د فلانکوچ مسافر وړونکي موټر چلوونکي ورته په موټر کې د سپرېدلو اجازه نه ده ورکړې.
کېميا وايي: «زموږ د کور پر مسير تلونکو موټروانانو ويل چې موږ له طالبانو سره د جنجال کولو وس نه لرو. که تا له ځان سره ښار ته يوسو طالبان مو وهي.»
ومو غوښتل چې په دې تړاو په بلخ ولايت کې د طالبانو د امنيتي کسانو نظر واخلو خو هغوی چمتو نه شول چې په دې اړه څه ووايي. همدا راز په فارياب کې هم سيمهييز طالبان په دې اړه څه نه وايي.