اطلاعات روز: د ملګرو ملتونو د بشري مرستو د همغږۍ دفتر (اوچا) په ګډون د ۲۰ نړيوالو مرستندويو سازمانونو مديرانو په يوه ګډه اعلاميه کې ويلي چې له مرستندویه ښځو پرته به په افغانستان کې د مرستې رسونې ډيرې چارې ودرېږي.
دوی ويلي چې په غير دولتي بشردوستانه سازمانونو کې د ښځو پر کار کولو د طالبانو د بنديز پرېکړه به اړمنو ټولنو، ښځو، ماشومانو او په ټوله کې هيواد ته ډېر زيان ورسوي.
د نړيوالو سازمانو مديرانو ويلي چې په افغانستان کې بشري بحران ته د ځواب ويلو لپاره ښځينه کارمندانې ډېرې مهمې دي. «دوی (ښځې) زده کوونکې، د تغذيې کارپوهانې، د ټيمونو مشرانې، د ټولنيزې روغتيا کارکوونکې، واکسين ورکوونکې، نرسانې، روغتيا پالانې او د سازمانونو مشرانې دي.»
دوی ويلي چې ښځينه مرسته کوونکې هغو ټولنو ته لاسرسی لري چې د دوی نارينه همکاران يې نه لري.
دې مديرانو ټيڼګار کړی چې په مرستندویه چارو کې د ښځو ګډون د بحث وړ موضوع نه ده او بايد دوام ورکړل شي.
د نړيوالو او مرستندویه سازمانونو مديرانو ويلي چې د دوی وړاندوينه داده چې ډېری چارې بايد ودرول شي؛ «ځکه نه شو کولای چې ډېری اصولي بشري مرستې له ښځينه مرسته رسوونکو پرته وړاندې کړو.»
دوی له طالبانو غوښتي چې د ښځو د کار، تعليم او تحصيل د بنديز پرېکړه دې واخلي او هيڅ هيواد نشي کولای چې خپل نيمايي نفوس په ټولنه کې له ګډونه محروم کړي.