اطلاعات روز: په ملګرو ملتونو کې د افغانستان سفارتونو او دايمي استازولۍ په پاکستان کې د افغانستان د مهاجرو ماشومانو نيول د بشري حقونو نقض ګڼلی دی.
دې استازو نن (شنبه، ۱۰ د مرغومي) د يوې اعلاميې په خپرولو سره ويلي، چې په پاکستان کې د ماشومانو په ګډون د افغانستان د پناه غوښتونکو د نيونې راپورونو سخت اندېښمن کړي دي.
په ملګرو ملتونو کې د افغانستان استازولۍ ويلي چې پناه اخيستنه يو انساني حق دی او د پناه غوښتونکو د ۱۹۵۱ کال له کنوانسيون له مخې، د دې کنوانسيون غړي هیوادونه باید هغه پناه غوښتونکي مجازات نه کړي چې ژوند او ازادۍ يې له ګواښ سره مخ وي.
دې استازولۍ همدا راز زیاته کړې، چې د ملګرو ملتونو د پناه غوښتونکو د عالي کميشنرۍ (UNHCR) له اصولو سره سم، مهاجر ماشومان د مهاجرت وضعيت ته له پام پرته، نه شي نيول کېدای.
دې سفارتونو په پاکستان کې د افغانستان د ماشومانو نيونه د بشري حقونو څرګند نقض ګڼلی دی.
د افغانستان سفارتونو او په ملګرو ملتونو کې د افغانستان دايمي استازولۍ په تېرو څلورو لسيزو کې د ميليونونو افغان کډوالو د کوربه توب په خاطر له پاکستانه مننه کړې او عین حال کې يې غوښتنه کړې چې دا ماشومان دې سمدستي خوشې کړي او له خپلو نړيوالو ژمنو سره سم دې، د هغوی ملاتړ وکړي.
دې بنسټونو همدا راز غوښتنه کړې چې له خپلې خوښې پرته افغانستان ته د دې مهاجرينو بيا لېږد دې ودرول شي.
د افغانستان سفارتونو او دايمي استازولۍ د ملګرو ملتونو د کډوالۍ له عالي کميشنرۍ او د بشري حقونو د کميشنرۍ له عالي دفتر (OHCHR) څخه غوښتنه کړې چې د افغانستان د پناه غوښتونکو په ځانګړې توګه ښځو او ماشومانو زوروونکي حالت ته دې ځانګړې پاملرنه وکړي.
په اسلام اباد کې د افغانستان د سفارت له معلوماتو سره سم چې د طالبانو له خوا اداره کېږي، د پاکستان په زندانونو په ځانګړې توګه کراچۍ کې د افغانستان ټولټال دوه زره مهاجرين زنداني دي، له دې ډلې يې ۵۰۰ خوشي شوي او پاتې نور يې له بيا – بيا ژمنو سره – سره نه دي پرېښودل شوي. په دې زندانيانو کې ښځې او ماشومان هم شامل دي.
په پاکستان کې د افغانستان د مهاجرينو نيول کېدلو ګڼ غبرګونونه راپارولي دي.
په پاکستان کې د ملګرو ملتونو د پناه غوښتونکو عالي کميشنرۍ (UNHCR) ويلي چې په پاکستان په ځانګړې توګه د سند ايالت په کراچۍ ښار کې د افغانستان د مهاجرینو انځورونو او د نيونې راپورونو «اندېښمن کړي» دي.
