د معلولينو د معاش نه ورکړه؛ کندوز کې معلولين: اړ يو چې خيرات ټول کړو

اطلاعات روز: کندوز ولايت کې يو شمېر معلولين وايي، چې خپل کلني حقوق يې نه دي ترلاسه کړي او له بد اقتصادي وضعيت سره مخ دي. دوی وايي، چې د ډوډۍ موندلو لپاره اړ دي چې فقر وکړي.

د کندوز ښار اوسېدونکی محمد عظيم چې له شوروي سره د مجاهدينو د جګړې پر مهال يې يوه پښه بايللې وايي، چې د جمهوريت په وختونو کې يې هر کال ۶۰ زره افغانۍ معاش تر لاسه کاوه؛ خو د ده په وينا چې روان کال يې يوازې ۱۸ زره افغانۍ تر لاسه کړې دي.

دی وايي، چې د طالبانو مسوولينو ورسره ژمنه کړې چې ۱۸ زره نورې افغانۍ به هم ورته ورکړي؛ خو تر اوسه دا ژمنه نه ده عملي شوې.

محمد عظيم وايي، چې د معاش د ځنډ او کمېدلو لامل يې نه دی روښانه.

د ده په خبره، چې د طالبانو مسوولين د خپلې ډلې معلولينو ته پام کوي او نور معلولين له پامه غورځوي.

دی زياتوي، چې اوس مهال د سون مواد نه لري، د ورځې په ښار کې خيرات ټولوي تر څو د يو څو وچو ډوډيو پيسې پيدا کړي.

شير محمد په کندوز کې يو بل معلول دی او د جګړې له امله يې يوه سترګه بايللې، دی هم معلولينو ته د طالبانو د حکومت له نه پاملرنې شکايت کوي.

د ده په وينا، طالبانو يې د حقونو د ورکړې ژمنه کړې؛ خو يو کال تېرېږي او تر اوسه د دوی د حقونو په اړه هيڅ خبر نشته.

شير محمد زیاتوي، چې ډېرې سختې ورځې تېروي. دی وايي چې له بشري مرستو هم بې‌برخې شوی دی.

خو په کندوز کې د طالبانو د شهيدانو او معلولينو رياست وايي، چې ټولو معلولينو ته رسيدګي کوي.

د دې رياست په وينا، په کندوز کې درې زره او ۵۵۰ معلولين ثبت دي او سږ کال يو زر ۸۰۰ نفرو ته د شپږو مياشتو معاش ورکړل شوی چې د تېر دولت معلول سرتېري، ملکي افراد او طالبان هم پکې شامل دي.

د معلولينو او متقاعدو کارمندانو معاشونه په ځينو نورو ولايتونو کې هم نه دي ورکړل شوي. دليل يې روښانه نه دی؛ خو داسې ښکاري چې د طالبانو حکومت د بودیجې له کمښت سره مخ دی.

د معلولينو د معاش د ورکړې په بهير کې د تبعيض ادعاوې هم کېږي. ځيني معلولين وايي، چې طالبان خپلو جنګي معلولينو ته پام کوي، او پخواني معلولين له پامه غورځوي.