پوټزل: د ښځو پر کار او زده کړو بنديز د افغانستان اقتصاد زيانمنوي

اطلاعات روز: افغانستان کې د ملګرو ملتونو د معاونت دفتر (يوناما) سياسي مرستيال مارکس پوټزل د طالبانو د امر بالمعروف او نهی عن المنکر له سرپرست وزير سره ليدلي او د ښځو پر کار او زده کړو د بنديز د ژر ليرې کېدو غوښتنه يې کړې.

يوناما نن (يکشنبه، ۱۸ د مرغومي) د پوټزل په خواله پر خپله فيسبوک پاڼه ليکلي چې «د ښځو پر خلاف د طالبانو تبعيضي» وروستي بنديزونه د دې لامل کېږي چې افغانانو ته د ژغورنې د مرستو رسېدو مخنيوی وکړي او د افغانستان اقتصاد زيانمن کړي.

نوموړي پر زده کړو او په خيريه موسېسو کې د افغان ښځو پر کار د بنديز ليرې کېدو غوښتنه کړې.

پوتزل تر دې وړاندې له نورو طالب چارواکو سره هم د ليدنې پر مهال ټينګار کړی و چې د ښځو پر خلاف لګېدلي بنديزونه دې لغو شي.

طالب چارواکو په بېلابېلو غونډو کې د ښځو پر کار او زده کړو د بنديز دفاع کړې.

د دې ډلې د لوړو زده کړو سرپرست وزير ندامحمد نديم په خپلو وروستيو څرګندونو کې ويلي، چې جمهوري نظام د «ښځو د سپکاوي» لار برابره کړې وه، خو طالبان دې ته دوام نه ورکوي.

ده د ښځو ورزش او تفريح «بې عزتي» بللې ده.