اطلاعات روز: لوګر او پکتیا ولایت کې د طالبانو د پوهنې ریاستونو مسوولینو ویلي چې د پوهنې له وزارت دوی ته له ۶ سوه زره ټوکه ډېر درسي کتابونه رسېدلي دي.
د لوګر ولایت لپاره د طالبانو د پوهنې ریاست مسوولین وايي، چې دوی ته له اول تر دولسم ټولګي پورې لومړۍ چوپه ۲۰۳۸۱۹ ټوکه کتابونه انتقال شوي چې په وینا یې په راتلونکي کې به ۳۳۴۹۰۰ نور کتابونه هم دغه ریاست ته واستول شي.
د دغه ریاست تدریسي مرستیال عبیدالله هشام زیاته کړې چې دوی ته په را انتقال شویو درسي کتابونو کې په پښتو او دري دواړو ژبو شامل دي چې ډېر ژر به د مرکز پل عالم او اړونده ولسوالیو ښوونځیو ته واستول شي.
ورته مهال پکتیا ته هم د طالبانو د پوهنې وزارت له لوري ۴ سوه زره جلده کتابونه سپارل شوي دي، په دې ولایت کې د طالبانو د پوهنې رییس عبدالوکیل خالد په جوړو شویو مراسمو کې ویلي چې په دې سره به د زده کوونکو د درسي بهیر په وړاندې د کتابونو د کمښت رامنځته شوې ستونزه هواره شي.
نوموړي همدا راز ویلي په نږدې راتلونکي کې به ۴۱۹۹۸۲ نور کتابونه هم راورسیږي چې هم مهاله به د مرکز او ولسوالیو د پوهنې ریاست اړوند آمریتونو ته له پلان سره سم واستول شي.
په لوګر او پکتیا ولایتونو کې د دولتي ښوونځيو زده کوونکي د کتابونو په انتقال خوښ دي او وايي، راتلونکی تعلیمي کال به د تېر په څېر د کتابونو له کموالي سره نه مخ کیږي.
د لوګر ولایت د مرکز پل عالم اړوند بي بي آمینې لېسې یو زده کوونکي نورالله اطلاعات روز ته وویل، چې دوی تېر تعلیمي کال تر نیمايي ډېر کتابونه نه درلودل او په خبره یې چې له همدې امله یې درسي بهیر خورا منفي اغېزمن شوی و.
د پکتیا ولایت د جانخېلو ولسوالۍ د لسم ټولګي زده کوونکي شمال هم د کتابونو په رارسېدو خوښي څرګنده کړه او ویې ویل، چې د راتلونکي تعلیمي کال له پېل سره سم باید دوی له ټولو کتابونو برخمن شي.
اوس مهال په لوګر او پکتیا ولایتونو کې زرګونه زده کوونکي په دولتي ښوونځیو کې زده کړې کوي خو د کتابونو، مسلکي ښوونکو، سرپنا او نورو اړینو امکاناتو د کموالي له امله یې هر کال درسي بهیر له ګڼو ستونزو او خنډونو سره مخ وي.