اطلاعات روز: د ارزګان په مرکز ترينکوټ ښار کې لسګونه کسانو د یوه لاريون پرمهال د طالبانو له حکومت څخه غوښتنه وکړه چې دوی ته دې د کار زمينه برابره کړي.
دغه کارګران چې نن (چهارشنبه، ۲۸ د مرغومي) ترینکوټ ښار کې راټول شوي وو وايي، له يوې خوا د توکو نرخونه لوړ شوي او بلې خوا هیڅ کار روزګار نشته چې دوی یې وکړي.
د اسماعيل په نوم یوه لاریون کوونکي په قهرجنه لهجه وویل، چې له څو مياشتو راهیسې هره ورځ ښار ته د کار په لټه راوځي خو په خبره يې هېڅ ورځ یې کار ندی موندلی.
نوموړي پر طالب مسولينو غږ وکړ چې د دوی لپاره دې د کار زمينه برابره کړي.
هغه زياته کړه: «زما غوښتنه د حکومت څخه دا ده چې موږ ته يو کار راپیداکړي که غلا وکړم لاس راڅخه پرې کوي زه پر کومه ولاړ شم زموږ دغه ستونزو ته دې پام وشي.»
د محمد رحیم په نوم یو بل لاریونوال بیا د لوړو نرخونو او بې روزګارۍ څخه شکایت کوي وایي، روان ژمی نه د خوړلو لپاره څه لري او نه هم د سون توکو اخیستلو وس او توان لري.
نموړی د طالبانو له حکومت څخه غوښتنه کوي چې د بیا رغونې کارونه دې پېل کړي ترڅو د ده په ګډون ټول بې روزګاره کسانو ته د کار زمينه برابره شي.
هغه وویل: «نه ۵۰۰ شته او نه هم ۱۰۰ شته نن مې شلمه ورځ ده ولاکه مې روزانه پیداکړي وي، ټول وطن بې روزګاره شوی زموږ ګناه څه ده ولاکه يو من د خوراک اوړه په کور کې لرم.»
ورته مهال ارزګان کې د طالبانو ولايتي مسوولين د بې روزګارۍ ستونزه مني خو وایي، دوی هڅه کوي چې د بېلابېلو پروژ پلي کېدو سره خلکو ته د کار زمینه برابره کړي.
د دي ولایت لپاره د طالبانو والي مولوي علي جان احمد وايي، چې په راتلونکو ورځو کې به د بې روزګارۍ د له منځه وړلو په موخه دغلته د کانونو د استخراج کارونه پېل شي او ترڅنګ به يې دوی هڅه وکړي چې د بیا رغونې کارونه هم پېل کړي.
خلک روان سوړ ژمی داسې مهال تجربه کوي چې د طالبانو واکمنېدو وروسته ډیری کسانو خپلې دندې له لاسه ورکړي او د بې روزګارۍ له امله د خپلو اولادونو او کور توکو پلورلو ته اړ شوي دي.
