اطلاعات روز: د ايران د بهرنيو چارو وزير حسين امير عبداللهيان له خپل قطري سيال محمد بن عبدالرحمن آل ثاني سره په يوه خبري غونډه کې له زده کړې د افغان نجونو محرومول ناسم اقدام او «د اسلام دين له لارښوونو» سره په ټکر کې ګڼلی دی.
د ايرنا خبري اژانس له راپور سره سم، عبداللهيان د قطر له بهرنيو چارو وزير سره د افغانستان، اوکراين او سيمهييزو بدلونونو په اړه خبرې کړې دي.
نموړي تېره ورځ (يکشنبه، ۹ د سلواغې) په يوه خبري غونډه کې وويل: «که څه هم موږ په افغانستان کې له واکمنې ډلې سره خپلې اړيکې تر يوې کچې فعالې کړې دي، خو د دې هيواد د ثبات، ارامۍ او پرمختګ لپاره د يوه ټولګډونه حکومت د جوړولو پر اړتيا ټينګار کوو او يو ځل بيا له زده کړو څخه د افغان ښځو او نجونو محرومول ناسم اقدام گڼو او د اسلام د رحماني دین د لارښوونو خلاف یې بولو.»
عبد اللهیان زیاته کړې چې ایران چمتو دی چې له طالبانو سره په همغږۍ د علم د ودې او د افغانستان د ښوونځیو او پوهنتونو د پرانیستې او فعالیت په موخه مجازي اقدامات وکړي، درسي کتابونه او لوجیستیکي امکانات برابر کړي.
تر دې وړاندې د ایران د بهرنیو چارو وزیر د طالبانو له لوري د ښځو پر زده کړو بندیز د اسلامي لارښوونو خلاف بللی و او په دې اړه یې اندېښنه څرګنده کړې وه.
طالبانو په خپله وروستۍ پرېکړه کې د خصوصي تحصيلي بنسټونو په کانکور ازموينه کې د ښځينه محصلينو پر نومليکنه بنديز لګولی دی.
دې ډلې تر دې وړاندې تر شپږم ټولګيو پورته نجونو پر وړاندې ښوونځي تړلي او په دولتي پوهنتونو کې يې د ښځو او نجونو لوړې زده کړې هم ځنډولې دي.
طالبانو په غير دولتي ادارو کې د ښځو پر کار کولو هم بنديز لګولی دی.