اطلاعات روز: د طالبانو د سرپرست حکومت د کورنيو چارو وزارت د نشهيي توکو پر وړاندې د مبارزې معین عبدالحق اخوند همکار، وایي، چې د دغې ډلې ځواکونو د تېر یوه کال په جريان کې د هېواد په کچه د نشهيي توکو د کښت، قاچاق او خرڅلاو پر وړاندې ۳۷۰۰ بېلابېل عملیاتونه ترسره کړي دي.
عبدالحق اخوند نن (پنج شنبه، ۲۰ د سلواغې) کندهار ته د خپل سفر پرمهال وویل، چې د دغه عملیاتونو په جريان کې یې ۴۰۴ ټنه بېلابېل ډوله نشهيي توکي لکه هيروين، شيشه، چرس او شراب نيولي او دغه راز ۱۴۸ د شرابو کارخونې يې هم له منځه وړي دي.
د هغه په وينا، په يادو عملياتو کې طالب ځواکونو د هېواد له بېلابېلو ولايتونو څخه د نشه يي توکو د کښت، قاچاق او پلور په تړاو ٤٦٥٠ کسان نيولي دي.
همکار زياتوي، وروسته له هغه چې د طالبانو د مشر ملا هبت الله اخندزاده له لوري په ټول هېواد کې د نشهيي توکو پر کرکیلې بنديز ولګېد ورسره يو وخت يې پر ۱۱۴۷ هکټاره ځمکه کرل شوي نشه یي بوټي له منځه وړي.
د عبدالحق اخوند په وينا: «د نشهيي توکو کوم مرکزونو چې موږ له منځه وړي او عمليات پرې ترسره کړي ډېری يې په جنوب غرب حوزې کې وو.»
هغه د کابل پُل سوخته روږدو ته په اشارې سره وويل، چې همدې کال په اوږدو کې يې ۷۵۰۰ تنه معتادين نيولي او په روغتيايي مرکزونو کې تر درملنې لاندې دي.
په ورته وخت کې د طالبانو حکومت د نشهيي توکو پر وړاندې د مبارزې معینیت د دفتر ریيس حبيب الله احمدي وويل، د هيواد ټولو ولايتونو ته يې سفرونه پېل کړي ترڅو خلکو او کروندګرو ته د نشهيي توکو سره د مبارزې په اړه عامه پوهاوی ورکړي.
دده له قوله چې د طالبانو حکومت د مشر ملا هیبت الله اخندزاده د وروستيو فرمانونو د تطبيق په موخه یې د کندهار، زابل او نورو ولايتونو له واليانو، امنيه قوماندانانو او نورو لوړ پوړو چارواکو سره د ليدنې په موخه سفرونه پېل کړي ترڅو دغه فرمانونه په ښه توګه تطبيق شي.
دا په داسې حال کې ده چې د روان کال د وري په ١٤مه د طالبانو مشر ملا هيبت الله اخندزاده په يوه حکم کې د کوکنارو کښت په بشپړه توګه منع کړ او ويې ويل چې «هېڅوک نشي کولى د دغه بوټي د کرلو هڅه وکړي.» په دغه حکم کې ویل شوي چې له سرغړونکو سره به د شریعت له مخې چلند کیږي او د هغوی کښت به هم له منځه وړل کېږي.