اطلاعات روز: د جرمني د بهرنيو چارو وزيره انالنا بربوک وايي، اروپايي ټولنه په دې لټه کې ده ترڅو پر طالبانو د بشري حقونو د نقض له کبله بنديزونه ولګوي.
د دویچهوله د راپور له مخې، هغې د اروپايي اتحاديې د بهرنيو چارو له وزيرانو سره تر مشورې وروسته ويلي، چې طالبان د ښځو او نجونو پر خلاف د کلکو بنديزونو لګولو ته دوام ورکوي.
بربوک له خپلو هالنډي او فرانسوي سيالانو سره په خبرو کې زياته کړې، چې پر طالبانو بايد د بشري حقونو د تروړنې په خاطر بنديزونه ولګېږي.
دې ويلي: «موږ به ټول يو ځای [دا بنديزونه] د راتلونکې غونډې لپاره تيار کړو.»
د جرمني د بهرنيو چارو وزيرې زياته کړې چې په بشري او مرستندويو بنسټونو کې د ښځو پر کار بنديز د منلو وړ نه دی.
دې زياته کړې: «موږ د اروپايي اتحاديې په توګه د دې مسلې ملاتړ نه شو کولای او نه یې کوو چې بشردوستانه مرستې دې يوازې د نارينهوو له خوا نارينهوو ته ورکړل شي.»
د لوېديځو هيوادونو ښځينه بهرنيو چارو وزيرانو د جرمني – مونيخ په امنيتي کانفرانس کې د يوې ګډې اعلاميې له لارې ویلي، چې طالبان د افغانستان د نيمې ټولنې په حذفولو سره په ډېره شديده توګه بشري حقونه نقضوي.
دوی پر ښځو د طالبانو بنديزونه غندلي او ويلي يې دي چې دا ډله غواړي له عمومي ژوند څخه ښځې حذف کړي.
اوس مهال په افغانستان کې ښځې او نجونې د طالبانو تر واکمنۍ لاندې د زده کړو او کار کولو حق نه لري.
له منفي غبرګونو او نړيوال فشار سره – سره طالبان له خپلو پرېکړو نه دي پر شا شوي.
