اطلاعات روز: اويا اروپايي هيوادونو د ملګرو ملتونو د بشري حقونو په شورا کې د يوې ګډې اعلاميې له لارې په افغانستان کې د ښځو او نجونو د حقونو د «مخ پر خرابېدونکي» وضعيت په اړه ژوره انديښنه ښودلې ده.
په دې اعلاميه کې راغلي، چې په افغانستان کې د ښځو او نجونو پر زده کړو او تحصيل بنديز هغوی له خپلو انساني حقونو محروموي.
اروپايي هيوادونو ټينګار کړی چې د زده کړې بشپړ حق د تلپاتي پرمختګ د لاسته راوړلو لپاره اساسي شرط دی.
له دې سره – سره، اروپايي هيوادونو ويلي، چې په ملي او نړيوالو سازمانونو کې د ښځو پر کار بنديز هغه ميليونونه افغانان له خطر سره مخ کړي چې د ژوندي پاتي کېدو لپاره يې تکيه پر بشري مرستو ده.
اروپايي هيوادونو زياته کړې: «موږ د يوه داسې راتلونکي د جوړولو لپاره ګډه ژمنه کوو چې هلته د ښځو په شمول ټول افغانان له هر ډول تبعيض پرته وکولای شي چې د افغانستان په ټولنه کې بشپړ، برابر او بامعنا ګډون ولري.»
دې هيوادونو له طالبانو غوښتي چې له نړيوالو قوانينو سره سم دې د ښځو او نجونو بشري حقونو ته احترام وکړي.
د بشري حقونو د شورا غونډه چې محور يې افغانستان و، تېره ورځ (دوشنبه، ۱۵ د کب) جوړه شوه.
د بشري حقونو د شورا د تېري ورځې د غونډې پر مهال په افغانستان کې د ملګرو ملتونو د بشري حقونو ځانګړي راپورچي ريچارډ بېنټ وويل، چې «د طالبانو قصدي سياست» د ښځو او نجونو له بشري حقونو انکار او له ټولنيز ژوند څخه د هغوی محرومول دي.
بېنټ په خپل دويم راپور کې چې تېره ورځ د بشري حقونو شورا ته وړاندې شو ويلي، چې د ۲۰۲۲ ميلادي کال د وروستيو شپږو مياشتو پر مهال په افغانستان کې د بشري حقونو وضعيت بدتر شوی دی.
