اطلاعات روز: نيمروز کې يوه ځايي سرچينه وايي، چې ایراني پوله ساتو ځواکونو هغه ۱۱ افغانان په ډزو وژلي چې غوښتل یې دغه هیواد ته په ناقانونه توګه واوړي.
سرچينه زیاتوي، دغه افغان ځوانان د ایران سيستان او بلوچستان ښار سره نږدې د دغه هیواد ځواکونو له لوري په ډزو ویشتل شوي او تیره ورځ (چهارشنبه، ۲۴ د کب) یې جسدونه د هیواد نیمروز ولایت ته رالیږدول شوي دي.
سرچینه زیاتوي، چې دغه ځوانان د نیمروز اوسېدونکي وو او دا پېښه څلور ورځې وړاندې رامنځته شوې وه.
د سرچينې په وينا د يادو ځوانانو جسدونه د ايران حکومت نیمروز کې د طالبانو مسوولینو ته سپارلي دي.
اطلاعات روز د وژل شویو ځوانانو په اړه نيمروز کې د طالبانو د ولايتي چارواکو د نظر اخيستلو هڅه وکړه خو، هغوی د يادې موضوع په اړه خپل نظر شريک نه کړ.
پر افغانستان د طالبانو واکمنیدو وروسته ګڼ شمیر ځوانانو د بې کارۍ، فقر او د طالبانو د بندیزونو له کبله په مرګونو لارو بهرنیو هیوادونو ته مخه کړې.
تيره مياشت هم په نيمروز کې دطالبانو ولايتي چارواکو خبر ورکړی و، چې دوی ته د ایران حکومت هغه ۵۵ جسدونه سپارلي چې په دغه هیواد کې په طبیعي پیښو او د ایراني ځواکونو له لوري په ډزو وژل شوي وو.