اطلاعات روز: د بلخ ولايت په مرکز مزار شريف ښار کې د داخلي توليداتو او لاسي صنايعو د معرفي او بازار موندنې په موخه درې ورځنی نندارتون جوړ شوی دی. خو په عين حال کې بلخۍ سوداګرې میرمنې د خپلو فعاليتونو د ټکني کیدو خبره کوي.
دا نندارتون د طالبانو له ادارو سره په همغږۍ د يوه خصوصي شرکت له لوري جوړ شوی دی.
د دې نندارتون سمبالوونکي يې د جوړولو موخه د داخلي توليداتو معرفي او هغو ته د مناسب بازار موندنه ښيي او وايي: «هڅه کوو چې د داسې نندارتونونو د جوړولو له لارې داخلي توليداتو ته رشد ورکړو.»
په دې نندارتون کې له شاوخوا ۱۰۰ غرفو څخه ۳۰ يې د ښځو لاسي صنايعو او ځايي خوراکونو ته ځانګړې شوې دي.
کومو ښځو چې د دې شرکت په نندارتون کې ګډون کړی دی، دا ډول برنامې له داخلي توليداتو سره د خلکو د بلدېدو او د ښځو د اقتصادي فعاليت د پياوړتيا لپاره اغېزناکې بولي.
يوه ښځه عذرا اميني وايي: «د هرې ورځې په تېرېدو زموږ پلور کم شوی دی. نندارتونونه هم کم جوړېږي. په ټوله کې فعاليتونه له رکود سره مخ دي. تر څو چې د ښځو د ملاتړ برنامې جوړې نشي، زموږ سوداګري به ختمه شي او زياتې ښځې به بېکاره شي.»
طالبانو پر ښځو پراخ بنديزونه لګولي دي. ويل کېږي چې د طالبانو تر واکمنېدو وروسته ډېری وړې سوداګرۍ چې ښځو مديريت کولې له رکود سره مخ شوې دي.