اطلاعات روز: د افغانستان د سولې په چارو کې د امريکا پخواني ځانګړي استازي او د دوحې هوکړه کوونکي زلمي خليلزاد ويلي، چې د امريکا دولت او طالبانو بايد د ياد هوکړه لیک د بشپړ تطبيق لپاره خپل تعامل زيات کړي.
نوموړي دا څرګندونې نن (دوشنبه، ۷ د وري) په پرلپسې ټویټونو کې د طالبانو هغې ادعا ته په غبرګون کې کړي چې ويلي يې دي په بلخ کې یې د داعش درې مهم غړي وژلي دي.
طالبان ادعا کوي چې په مزار شريف کې د دې ډلې په وروستيو عملياتو کې د داعش د دویم کلیدي کس په ګډون د دې ډلې دري غړي وژل شوي دي.
خليلزاد ويلي، چې که د طالبانو دا ادعا تاييد شي، نو د افغانستان په شمال کې پر داعش «لوی ګوزار» شوی دی.
دی وايي چې طالبانو په دوحه کې هوکړه کړې وه چې له داعش سره به مبارزه کوي او د خليلزاد په وينا چې د داعش د مشرانو حذفول ښيي چې طالبان پر خپلو وعدو عمل کوي.
خليلزاد ليکلي: «متحده ايالات او طالبان بايد د دوحې د توافق چې د افغانستان او متحده ايالاتو له ګټو سره برابر دی، د بشپړ تطبيق لپاره خپل تعامل زيات کړي.»
دا څرګندونې په داسې حال کې کېږي چې امريکا او طالبان يو او بل د دوحې د توافق په نقض تورنوي.
امريکا د ۲۰۲۲ کال په جولای مياشت کې اعلان وکړ چې د القاعده مشر ايمن الظواهري په کابل کې وژل شوی دی. د امريکايي چارواکو په وينا، طالبانو د دوحې د توافق پر خلاف الظواهري ته پناه ورکړې وه. طالبانو تر اوسه په کابل کې د الظواهري وژل کېدل نه دي تاييد کړي.
د خليلزاد د څرګندونو بر خلاف، د امريکا نظامي چارواکي په افغانستان کې د داعش د فعاليتونو د زياتېدو ادعا کوي.
د امريکا د پوځ د مرکزي قومندانۍ قومندان جنرال مايکل کوريلا په خپلو تازه څرګندونو کې ويلي، چې داعش په افغانستان کې تر شپږو مياشتو په کمه موده کې کولای شي چې د امريکا يا بل لوېديځ هيواد ګټې وګواښي.
ده د امريکا سنا ته ويلي، چې په اسيا او اروپا کې د «بهرنيو عملياتو» لپاره د داعش وړتيا په چټکۍ مخ پر زياتېدو ده.
طالبانو د سنتکام د قومندان ادعا رد کړې او ويلي يې دي چې امريکايي چارواکي دې د داعش له لوی ښودنې لاس واخلي.
