اطلاعات روز: د افغانستان د سولې په چارو کې د امریکا پخواني ځانګړي استازي او د امریکا او طالبانو ترمنځ د دوحې د تړون لاسلیکوونکي، زلمي خلیلزاد یو ځل بیا د دې هوکړې پر بشپړ تطبیق ټینګار کړی دی.
نوموړي نن (دوشنبه، ۱۴ د وري) په یوه ټویټ کې د دغه تړون بشپړ تطبیق په افغانستان کې له اوسنیو ننګونو څخه د وتلو لار ګڼلې ده.
خلیلزاد لیکلي:«د افغانستان ملي ټلویزیون، چې د (طالبانو) یوه دولتي سټېشن دی، د هېواد له اوسنیو ننګونو څخه د وتلو لپاره د دوحې د هوکړې د بشپړ تطبیق لپاره یوه ځانګړې خپرونه خپره کړه. او زه موافق یم.»
د افغانستان د سولې په چارو کې د امریکا پخواني ځانګړي استازي تر دې مخکې ویلي و، چې د امریکا حکومت او طالبان باید د یاد هوکړه لیک د بشپړ تطبیق لپاره خپل منځي اړیکې زیاتې کړي.
طالبان د دې ډلې پر غړو د بندیزونو لېرې کول د دوحې د هوکړې یوه برخه ګڼي او پر عملي کېدو یې ټینګار کوي.
له بلې خوا امریکا د طالبانو او ترهګرو ډلو ترمنځ د اړیکو په پریکولو ټینګار کوي چې په ځلونو یې دغه ډله د خپلې ژمنې په ماتولو تورنه کړې ده.
امریکا د ۲۰۲۲ کال په جولای میاشت کې اعلان وکړ چې په کابل کې یې د القاعده مشر ایمن الظواهري وژلی دی. د امریکايي چارواکو په وینا طالبانو الظواهري ته د دوحې د هوکړې خلاف پناه ورکړې وه. طالبانو تر اوسه په کابل کې د الظواهري وژل کېدل نه دي تایید کړي.
