اطلاعات روز: د کندهار د سوداګرۍ او پانګونې خونې مسوولين وايي، چې په تېر کال کې یې د څه باندې ۳۳۰ ميليونه امريکايي ډالرو په ارزښت بېلابېلا توکي بهرنیو هیوادونو صادر کړي دي.
د کندهار د سوداګرۍ او پانګونې خونې مرستيال انجنیر عبدالباقی بنا وايي، په تېر ۱۴۰۱ کال کې يې څه د پاسه درې لکه او ۳۴ زره ټنه بېلابېل توکي بهرنيو هيوادونو ته صادر کړي دي.
بنا زیاتوي، په صادراتو کې تر ټولو زيات تازه او وچې میوې او همدارنګه معدنیات، حبوبات او طبیعي نباتات شامل دي.
د ده په وينا: «۱۴۰۱ کال د صادراتو په باب يو ډېر ښايسته کال و، په دې کې زموږ تازه مېوه انار هم ۸۸ زره ټنه صادر شوي، خو په مجموع کې تازه مېوه یو لک، ۴۳ زره او ۹۳۸ ټنه صادره شوې او وچه مېوه ۵۵ زره او ۱۵۳ ټنه صادر شوې، په دې کې معدنيات ۷۰زره ټنه، حبوبات ۵۴ زره ټنه او طبیعي نباتات ۲۸زره ټنه صادر شوي دي.»
په ورته وخت کې کندهار کې بیا پانګوال د برېښنا پر نشت د وېزو پر ورکړې او لارې په اوږدو کې له شته ستونزو شکایت کوي.
دغلته د عبدالباري په نوم د تازه مېوو سوداګر خپلې لویې ستونزې د بریښنا نشتون د ویزو ورکړه او د بهر څخه د پیسو انتقال یادوي.
دی زياتوي، چې هرکال د تازه ميوو په موسم کې د ګاونډيو هيوادونو په تېره بیا د پاکستان له لوري د سرحدونو په اوږدو کې ورته ستونزې پېښېږي چې له امله یې د دوی تازه میوې پر وخت بازار ته نه رسیږي.
دی د طالبانو له سرپرست حکومت څخه غوښتنه کوي چې د سوداګرۍ په برخه کې دوی ته اسانتیاوې برابرې کړي.
همدارنګه د وچې او تازه ميوې يو بل سوداګر حاجي نعمت الله وایي، د نورو کلونو په پرتله يې سږکال ستونزو ته پر وخت رسېدنه شوې ځکه په صادارتو کې یې د پام وړ زياتوالی راغلی دی.
دی زیاتوي، که څه کم هر کال د کندهار سوداګرو ته په بېلابېلو برخو کې ستونزې جوړې شوي، خو بيا هم په خپلو هڅو بهرنيو هيوادونو ته په زياته اندازه صادارت کړي دي.
د يادونې وړ ده چې په تېر ۱۴۰۱ کال کې د نورو کلونو په پرتله له کندهاره څخه په صادراتو کې ۶۵ سلنه زياتوالی راغلی چې د مسوولينو په خبره دا د راتلونکي کال لپاره يو ښه زېری دی.