اطلاعات روز: کندهار کې د طالبانو د پولیسو مطبوعاتي مسوولین وایي، چې په تېر ۱۴۰۱ کال کې يې یو زر او ۹۰۴ تنه د پېلابېلو جرمونو په تور نيولي دي.
د کندهار د امنيې قوماندان لپاره د طالبانو وياند حافظ صابر وایي، دغه کسان يې د جنايي، تروریزم، نشهيي توکو او نورو بېلابېلو جرمونو په تور نيولي دي.
صابر وويل: «تېرکال مو يوازې د جنايي جرمونو لکه د قتل په تور ۴۹ تنه، د غلاوو په تور ۸۴۳ تنه، انسان تښتوونې په تور ۴۸ تنه، د ترافيکو حوادثو په تور ۱۲۳ تنه، د جنګ په تور۸۴، او همدارنګه د قماربازۍ، رشوت، جيل او تزويد، او غير قانوني اسلحې په تور ۷۵ تنه او د نور جرمونو په تړاو لسګونه نور کسان نیولي دي.»
دغه راز نوموړی زیاتوي، چې د تېر کال پرمهال يې پر سلګونه جريبه ځمکې باندې کرل شوي کوکنار او بنګ له منځه وړي دي.
دی وایي، د تېر کال په جريان کې یې په سلګونه کيلو نشهيي توکي لکه چرس، ښيښه، هيروين او ټابليټ k نيولي او دغه راز يې په سلګونه لېټره شراب هم نیولي دي.
د امنیې قومندانۍ ویاند وایي، چې د نيول شويو کسانو قضيې يې عدلي او قضایي ارګانونو ته سپارلي او زنداني کېدو په تړاو به يې هلته پرېکړه کېږي.
په ورته وخت کې د کندهار اوسېدونکي د طالبانو له امنيتي مسوولينو غوښتنه کوي ترڅو د کندهار امنيت ته خپله توجه لا زياته کړي.
دوی وایي، د څو مياشتو راهیسې په کندهار ښار او ولسواليو کې وسله والې غلاوې زياتي شوي چې ورسره يو وخت يې خلک ډېر اندېښمن کړي دي.
