اطلاعات روز: د طالبانو مشر هبت الله اخندزاده په یوه غږیز کلیپ کې چې د دغې ډلې د ویاند له خوا خپور شوی طالب چارواکو ته په خطاب کې ویلي، چې که په ظلم او له محکمې پرته وژنې وشي حکومت یې نه پاتې کېږي.
ده د خلکو د «وهلو ټکولوِ» زندان کې د اچولو او د عدالت نه تامین له امله د طالبانو د «امارت» د نسکوریدو خبرداری ورکړی او زیاته کړې یې ده «که خدای وغواړي امارت به په یوه ساعت کې نه په یوه ثانیه کې وغورځیږي.»
د طالبانو مشر په دغه پیغام کې یوې مشخصې پېښې ته له اشارې پرته ټینګار کړی چې « عدالت د یوه حکومت د بقا ذریعه ده د ظلم سره حکومت نه شي پاتې کېدای».
هبت الله په دې پیغام کې خبرداری ورکړی، چې د عدالت نشتون په صورت کې ظلم، خود غرضي، وژنې، انتقام او له محاکمې پرته وژنې رامنځته کېږي او دا یې د هیواد تباهي بللې ده.
اخندزاده د ظلم د مخنیوي لپاره د علماوو په سمو فیصلو او طالبانو د حکومت په سمو اجراتو ټینګار کړی دی.
د طالبانو مشر په داسې حال کې د ظلم د مخنيوي او د عدالت د پلي کیدو خبره کوي، چې یو شمیر نړیوالو سازمانونو په وار وار د طالبانو له خوا د تېرحکومت د ځواکونو او عامو خلکو د خپلسرو نيولو، وژنو او شکنجو راپورونه ورکړي دي.
