اطلاعات روز: د بشري مرستو لپاره د ملګرو ملتونو د همغږۍ دفتر (اوچا) وايي، چې د بودیجې په پای ته رسېدو سره افغانستان په وروستيو ۲۵ کلونو کې د لوږې له تر ټولو لوی خطر سره مخ دی.
اوچا دا موضوع نن (يکشنبه، ۲۷ د وري) په يوه ټويټ کې مطرح کړې ده.
دې بنسټ وړاندې ويلي و، چې په افغانستان کې د بشري عملياتو لپاره بودیجه پر ختمېدو ده او دا چاره د ميليونونو وګړو ژوند له خطر سره مخ کوي.
د اوچا په وينا، په افغانستان کې د ۲۰۲۳ کال د مرستو لپاره د دې سازمان تر پنځه سلنې کمې مالي غوښتنې تأمين شوې دي.
دا بنسټ وايي په داسې حال کې چې افغانستان په نړۍ کې تر ټولو لوی او تر ټولو جدي بشري کړکېچ دی، خو بيا هم په هيواد کې بشري عمليات تر ټولو کمې مالي مرستې تر لاسه کوي.
د اوچا په وينا، په افغانستان کې ۲۸ ميليونه وګړي بشري مرستو ته اړتيا لري.
د ملګرو ملتونو له شمېرو سره سم، په افغانستان کې شاوخوا شپږم ميليونه وګړي د خوراکي ناامنۍ له بېړنۍ کچې سره مخ دي او يوازې يو ګام له لوږې لېرې دي.
ملګرو ملتونو په افغانستان کې د بشري عملياتو لپاره د ۴.۶ ميليارد ډالرو غوښتنه کړې ده.