اطلاعات روز: د طالبانو د لومړي وزير د اقتصادي مرستيالۍ دفتر وايي، چې د دې ډلې د اقتصادي کميسيون د پرېکړي پر اساس به نږدې راتلونکي کې د مزار شريف-هرات-کندهار تر منځ د اوسپنې پټلۍ کار پېل شي.
د دې دفتر په وينا، د طالبانو اقتصادي کميسيون د اوسپنې پټلۍ ادارې ته دنده سپارلې وه چې يوه پروژه مشخصه کړي تر څو په کورنيو عوايدو سره بشپړه شي. ويل شوي چې دې ادارې د مزار شريف-هرات-کندهار تر منځ د اورګاډي پټلۍ پروژه مشخصه کړې ده.
د دې پروژې د لګښت په اړه څه نه دي ويل شوي.
د طالبانو د لومړي وزیر د اقتصادي مرستيالۍ دفتر ويلي، چې دا پروژه يو زر او ۴۶۸ کيلومټره ده او ويل کېږي چې دا پروژه له نهو ولايتونو، ۲۷ ولسواليو او ۸۰۰ کليو تېرېږي.
دې دفتر زياته کړې، چې ياده پروژه به په دوو برخو کې بشپړه شي. لومړۍ برخه يې د مزار شريف- هرات تر منځ ده چې ۷۵۶ کيلومټره کېږي. ويل شوي چې د دې پروژې دويمه برخه چې ۸۱۱ کيلومټره کېږي له هراته پېلېږي او له فراه، نيمروز او هلمند ولايتونو په تېرېدو د کندهار تر سپين بولدک ولسوالۍ پورې رسېږي.
د طالبانو د لومړي وزير د اقتصادي مرستيالۍ دفتر ويلي، چې د دې پروژې په پلي کېدلو سره به ختيځه اسيا د افغانستان له لارې له ايران، ترکيې او اروپايي هيوادونو سره وتړل شي.
د افغانستان اقتصادي کړکېچ ته په پام، اندېښنه داده چې ايا د طالبانو حکومت به د دې پروژې په پلي کولو کې بريالی شي او که نه.