اطلاعات روز د ايران د پارلمان غړي حبيب الله دهمردي د دغه هېواد د بهرنيو چارو له وزير حسين اميرعبداللهيان سره په کتنه کې وړانديز کړی چې له هلمند سیند څخه د ايران د حقابې تر لاسه کولو لپاره بايد له طالبانو تضمين واخيستل شي.
د ايران د بهرنيو چارو وزارت نن (چهارشنبه، ۱۳ د غویي) په یوه خبرپاڼه کې ويلي، چې دهمرده په دې لیدنه کې خبرداری ورکړی چې په سيستان او بلوچستان کې به د اوبو د کړکېچ له کبله انساني ناورين پېښ شي او په دې اړه يې د طالبانو د جدي پاملرنې غوښتنه کړې ده.
ده زياته کړې: «په تېرو وختونو کې له افغان چارواکو سره مذاکراتو ښودلې چې د اوبو د حق اخيستل د نظام په بېلابېلو برخو کې نويو تګلارو او ښه انسجام ته اړتيا لري.»
د ايران د بهرنيو چارو وزارت د خبرپاڼې له مخې، حبيب الله دهمرده د افغانستان له اوسنيو واکمنو څخه د عملي تضمينونو د اخيستنې وړانديز کړی دی.
عبداللهيان ويلي، چې د دې هيواد د حقابې اخيستنه د ايران د بهرنيو چارو وزارت له لومړيتوبونو څخه دي.
ده زياته کړې: «ايران له هلمند سيند څخه د ايراني ملت د اوبو د حق په اخيستلو کې جدي دی او په سمرقند کې د دوو اړخيزو او د افغانستان د ګاونډيو هيوادونو د څو اړخيزو ناستو پر مهال له افغانستان سره په خبرو کې دا له اصلي موضوعاتو څخه يوه وه چې ما، د افغانستان په چارو کې د ايران د اسلامي جمهوريت استازي او وزارت مطرح کړې ده.»
عبداللهيان څرګنده کړې چې طالبان د ايران حق ته ژمنتيا ښودلې او تهران منتظر دی چې دا ډله به نه پر شا کېږي او اوبه به سيستان او بلوچستان ته رسېږي.
افغانستان او ايران د هلمند سيند د اوبو تقسيمولو لپاره په ۱۳۵۱ لمريز کال کې تړون لاسليک کړی دی.
ايران ادعا لري چې د افغانستان دولتونه له ياد شوي تړون سره سم د ايران د اوبو حق نه ورکوي. خو يو شمېر کارپوهان وايي، چې ايران د وروستيو کلونو پر مهال تر خپل حق زياتې اوبه اخيستې دي.
افغانستان د هلمند سيند پر مسير په نيمروز ولايت کې تر ۲۰۰ ميليونه په زيات لګښت يو بند جوړ کړی دی. دا بند چې کمال خان نومول شوی، کولای شي ۵۲ ميليونه متر مکعبه اوبه زېرمه کړي او همدا راز ۱۷۴ زره هکټاره کرنيزه ځمکه خړوبولای شي.