اطلاعات روز: کندهار کې له زندانه د یوه طالب چارواکي د خوشې کېدو د هرکلي لپاره هوايي ډزو او بې نظمیو په ټولنیزو رسنیو کې د یو شمېر هیواد والو تند غبرګونونه راپارولي دي.
د عبدالغني حقبین په نوم د طالبانو د سرپرست حکومت د کندهار د امنیې قومندانۍ د تروریزم مدیر چې څه موده وړاندې د «زنا» په تور د طالبانو د استخباراتو لهخوا نیول شوی او بندي شوی و، تېره پنجشنبه (۱۴ د غویي) له زندانه ازاد شو.
په ټولنیزو رسنیو کې په خپرو شوو ویډیوګانو کې لیدل کېږي چې یو شمېر کسان د نوموړي د خوشې کېدو په خوشالۍ کې ډزې کوي او بې نظمي جوړوي.
د ټولنیزو رسنیو یو شمېر کاروونکو دا کار غندلی او دا یې بې عدالتي او خپلسري بللې.
د عبدالحکیم الفت په نامه یو کس په خپله فیسبوک پاڼه د عدالت غوښتنه کړې او ویلي یې دي: «د لنډغريزم او زورواکۍ پر خلاف چپه خوله پاتې کيدل له تللو اتلانو سره خيانت او د خاين د ملاتړ په معنا او منافقت دی.»
دغه راز یو شمیر نورو کاروونکو بیا حقبین د طالبانو مشر هبت الله اخندزاده ته نږدې کس او د هغه قومي یاد کړی او ویلي یې دي چې «شرعي حدود» یوازې د ولس لپاره دي.
د فراهمند په نامه یوه کس لیکلي: د هبت الله تربور حقبین نورزی چې د درې لوڅو ښځو سره بالفعل نیول شوی و د څو ورځو دروغجن زندان څخه خلاص شو او طالبانو یې داسې هرکلی وکړ لکه د حج څخه چې راغلی وي.»
طالبانو تر اوسه په رسمي ډول نه دي ویلي، چې عبدالغني حقبین یې په کوم تور بندي او پرته له محکمې يې ولې خوشې کړی دی.