اطلاعات روز: د اسټراليا د پوځ لوی درستيز آنګوس کمپبل ويلي، چې امريکا د ۲۰۲۱ کال پر مهال اخطار ورکړی و چې په افغانستان کې د اسټراليا د ځانګړو ځواکونو له لوري د زندانيانو او ملکي وګړو د وژنې ادعاوې ښايي د هغه قانون د پلي کېدلو لامل شي چې متحده ايالات له اسټراليا سره له مرستې کولو منع کوي.
کمپبل نن چهارشنبه (۱۰ د غبرګولي) يوې پارلماني کميټې ته ويلي، چې په کانبرا کې د متحده ايالاتو د نظامي آتشې له لوري ورته ليک لېږل شوی و او په هغه کې د متحده ايالاتو اندېښنه بيان شوې وه.
په ۲۰۲۱ کال کې د بريټون راپور په نوم څېړنو وښوده چې د اسټراليا ځانګړو ځواکونو په افغانستان کې ظاهرا ۳۹ بې وسلې زندانيان او ملکي وګړي وژلي دي.
تر دې څېړنو وروسته اسټراليا ۱۹ اوسني او پخواني سرتېري تر قضايي تعقيب لاندې ونيول.
کمپبل ويلي، چې بريتون راپور د هغو ادعاوو په اړه چې متحده ايالات يې د بشري حقونو فاحش نقض ګڼي موثق اطلاعات لري او شونې ده چې له همدې وجې د «ليهي» په نوم د بشري حقونو ملاتړی قانون پلی شي.
ليهي قانون په هغو مواردو کې چې د بشري حقونو د فاحش نقض په اړه موثق معلومات موجود وي، د امريکا دولت له بودجې څخه له استفادې او يا هم بهرنيو امنيتي ځواکونو سره له مرستې کولو منع کوي.
د اطلاعاتي اسنادو له مخې د متحده ايالاتو دولت هغه وخت بيرته مرستې پېلولای شي چې دولت عدالت ته د تېروتو افرادو د سپارلو لپاره کوټلي ګامونه واخلي.
د يو شمير ځانګړو اسټرالوي پوځيانو په اړه د «جنګي جناياتو» يو لړ راپورونه خپاره شوي دي. د اسټراليا دفاع وزارت هم د يوه ځانګړي کميسيون له لارې دا راپورونه ارزوي.
