اطلاعات روز: کندهار کې د ۵۰ ميليونه امريکايي ډالرو په ارزښت د «سنو فارما» په نوم د درمل جوړونې يوه معیاري او ستره فابریکه پرانستل شوه.
د سنو فارما ریيس محمد سعيد صديق وایي، د دې فابریکې بنسټ په ۲۰۱۶م کال کې د ۷۱ تنو افغان پانګوالو لخوا ايښودل شوی او ۵۰ ميليونه امريکايي ډالر لګښت پرې راغلی دی.
نوموړي تېره شپه (دوشنبه، ۱۵ د غبرګولی) د دغې فابریکې د پرانستې پرمهال وويل، چې د خپلو توليد شويو درملو لپاره يې په ټول هيواد کې معلومداره قيمتونه ټاکلي ترڅو د هرې سيمې خلکو ته ارزانه تمام شي.
ده وویل، دا فابریکه په یو شفت یعنې اتو ساعتونو کې ۵ میلیونه او ۶ لکه ګولۍ، ۲ میلیونه کپسول او له ۶۰ زرو څخه تر ۹۰ زره بوتله پورې شربت جوړوي.
د دې فابریکې د پرانیستې په مراسمو کې د طالبانو د درملو او خوړو ادارې مشر ډاکټر عبدالباري عمر وویل، چې اوس مهال په ټول هيواد کې شپږ دغه ډول د درمل جوړونې کمپنۍ فعاليت لري او شاوخوا ۲۵ سلنه يې هيواد کې دننه د درملو اړتيا پوره کړې ده.
نوموړي زیاته کړه، هرکال ناروغ افغانان ۳۰۰ ميليونه امريکايي ډالر په بهرنيو او ګاونډيو هېوادونو کې د خپلې درملنې لپاره له افغانستانه باسي او هلته پرې درملنه کوي. دی وایي که هيواد کې داخلي درمل کيفيت پیدا کړې نو لسګونه ميليونه ډالر به سپما شي.
په همدې حال کې د طالبانو ویاند ذبیح الله مجاهد د یادې فابریکې جوړیدل د افغان ولس په خیر وګڼل او ویې ویل چې په دې سره به افغانان معیاري درملو ته لاسرسی ولري او د ګاونډیو هیوادونو له احتیاج به خلاص شي.
یاده دې وي چې دا مهال په دې فابریکه کې شاوخوا ۶۰۰ کسان په بېلابېلو دندو بوخت دي او د سنوفارما د مسوولینو په وینا چې په راتلونکي کې به یاد شمیر له ۸۰۰ څخه تر ۱۰۰۰ پورې ورسیږي.
