اطلاعات روز: په بدخشان کې سرچينې وايي، چې د بدخشان د مرکز فيض آباد په نننۍ (پنج شنبه، ۱۸ د غبرګولي) چاودنه کې د طالبانو د یوه لوړپوړي قومندان صفی الله صميم په ګډون ۱۴ تنه وژل شوي او تر ۵۰ زيات نور ټپیان دي. د طالبانو مسوولينو تر اوسه دا شميرې نه دي تاييد کړي.
د سرچينو په وينا، ښايي د مرګ ژوبلې شمېر تر دې هم زيات شي.
دا چاودنه نن تر غرمې وړاندې د فيض اباد ښار د لومړۍ ناحيې په نبوي نومي جومات کې شوې ده.
په دې مسجد کې د بدخشان لپاره د طالبانو د پخواني والي نثار احمد احمدي لپاره د فاتحې مراسم نيول شوي و. نوموړی دوې ورځې وړاندې په يوه موټربم چاودنه کې ووژل شو.
د بدخشان ولايت په ولايتي روغتون کې يوه سرچينه وايي، چې په دې چاودنه کې ملکي وګړو او طالب ځواکونو ته مرګ ژوبله اوښتې ده.
د طالبانو د يوې امنيتي سرچينې په شمول لږ تر لږه دوې سرچينې مني چې د بغلان لپاره د طالبانو پخوانی امنيې قومندان صفی الله صميم هم وژل شوی دی.
د سرچينو په وينا، پخوانی جهادي قومندان عبدالبصير خالد او ورور يې او د بدخشان يو قومي مخور حاجي اکرم هم په نننۍ چاودنه کې وژل شوي دي.
په بدخشان کې د طالبانو د اطلاعاتو او کلتور رييس معز الدين احمدي چاودنه او اوښتې مرګ ژوبله مني، خو دقيقه شمېره نه ښيي.
تر اوسه د چاودنې څرنګوالی نه دی روښانه شوی.
د بدخشان په مرکز کې دوې ورځې وړاندې يوې چاودنې د طالبانو مرستيال والي او يو بل کس ووژل او شپږ نور يې ژوبل کړل. دا يو ځانمرګی بريد و چې پړه يې داعش ډلې ومنله.
