اطلاعات روز: د طالبانو د کورنيو چارو وزارت اعلان کړی چې د بدخشان ولايت په نننۍ چاودنه کې ۱۱ تنه وژل شوي او ۳۰ نور ټپیان دي.
د طالبانو د کورنيو چارو وزارت وياند عبدالنافع ټکور پر خپله ټويټر پاڼه ليکلي، چې دا چاودنه نن (پنج شنبه، ۱۸ د غبرګولي) تر غرمې وړاندې شاوخوا ۱۱:۰۰ بجې د بدخشان لپاره د طالبانو د پخواني وژل شوي والي نثار احمد احمدي د فاتحې د مراسمو پر مهال په «نبوي جومات» کې شوې ده.
ده زياته کړې، چې دا شميرې د لومړنيو معلوماتو له مخې تر لاسه شوي او نور جزييات به وروسته شريک کړي.
د طالبانو د کورنيو چارو وزارت وياند د دې ډلې د قومندانانو او غړو د وژل کېدو په اړه څه نه دي ويلي، خو لږ تر لږه دوو سرچينو اطلاعات روز ورځپاڼې ته منلې چې په دې چاودنه کې د بغلان ولایت لپاره طالبانو پخوانی امنيې قومندان صفی الله صميم او يو شمير نور طالبان وژل شوي دي.
اطلاعات روز ورځپاڼې ته ځايي سرچينو ويلي، چې په دې چاودنه کې لږ تر لږه ۱۴ تنه وژل شوي او ۵۰ نور ژوبل شوي دي.
تر اوسه هيڅ کس او ډلې د دې بريد پړه نه ده منلې.
دوې ورځې وړاندې د بدخشان ولايت په مرکز کې يوې بلې چاودنې د بدخشان لپاره د طالبانو مرستيال والي نثار احمد احمدي وواژه او څلور تنه نور یې ژوبل کړل.
د هغه بريد مسووليت داعش ډلې منلی و.