اطلاعات روز: په ارزګان کې د اووه سوه هغه کورنیو سره د نغدو پیسو مرستې ترسره شوې چې په تيرو جګړو کې يې د کورنۍ غړي وژل شوي او يا هم معلول شوي ول. په دې ډله کې د مخکیني نظام سرتېري او د طالب وسلهوالو کورنۍ هم دي.
په ارزګان کې د شهيدانو او معلولينو وزارت د پلان او پالیسي معين عظيم اغا د دغو مرستو د ويش پر مهال وویل، دغه مرستې چې د هر وژل شوي کس کورنۍ ته ۷ زره او هر معلول ته شپږ زره افغانۍ ورکول کيږي، د يوه بهر ميشتي افغان لخوا شوي دي.
هغه وايي دغه ډول مرستو ته اړتيا زياته ليدل کيږي او غوښتنه يې وکړه چې په کوردننه او بهر ميشت تجاران او سوداګر باید له اړمنو کسانو سره مرستې وکړي.
عظيم اغا وويل، په افغانستان کې تر سیاسي بدلون رامنځته کيدو وروسته خلک له سختو اقتصادي ستونزو سره لاس او ګريوان دي او په کار ده چې د افغانستان کنګل شوې پیسې خوشې شي.
دی وايي: «يادې مرستې چې د يوه بهرمېشتي افغان لخوا ترسره شوي دي، هغه کسان چې وژل شوي وي او اوس يې یتیمان پاتې وي، هغه ته به ۷۰۰۰ افغانۍ ورکول کيږي او هغه کسان چې په جګړو کې معلول وي هغه ته به ۶ زره افغانۍ ورکول کيږي.»
په ورته مهال هغه کسان چې يادې مرستې يې ترلاسه کړي، خوښ دي او وایي چې دغه ډول مرستو ته يې زياته اړتيا درلوده.
محمد رحيم چې يادې مرستې يې ترلاسه کړي دي، وايي اوسنۍ مرستې يې ورته کافي نه دي او په کار ده چې په راتلونکي کې هم دوی له پام ونه غورځول شي او نورې دغه ډول مرستې هم ورسره ترسره شي.
هغه وايي ژوند يې له سختو کړاوونو ډک دی او که پاملرنه ورته ونه شي روان ژمی به يې په ډير سختۍ تير شي.
نوموړي وويل: «کور يې ودان هيڅ مې نه درلوده سخته مجبوره ومه خو اوس هم دغه مرستې زياتې لږ دی زموږ سره باید ډير مرستې وشي ترڅو دغه ژمې ورباندي تير کړو کورنۍ مې لويه ده زما يو لاس يوه پښه نشته څه وکړو کار روزګار نه شم کولی زموږ سره باید هرڅوک مرستې وکړي.»
په ارزګان کې د تيرو جګړو له امله زرګونه کسان معلول او وژل شوي دي چې دا مهال يې کورنۍ دغه ډول مرستو ته زياته اړتيا لري.